Juvilej Združeňa i perši Dzeň Rusynoch

Ювилей Здруженя и перши Дзень Русинох
Прешлого викенду, у Румуниї, у городзе Дева, отримана шветочносц з нагоди означованя дзешецрочнїци Културного здруженя Русинох у тей держави, як и перши Дзень Русинох Румуниї.
 

До городу Дева (коло 72 000 жительох у штреднєй Румуниї, 130 километри од Араду), всоботу, 4. септембра пришли Руснаци з рижних крайох Румуниї, представителє тамтейших културно-уметнїцких дружтвох, алє и представителє Шветовей ради РРЛ, та дзепоєдних орґанизацийох з жемох котри творя

 

Шветови конґрес РРЛ.
Так, шветочносц з нагоди означованя ювилею и першого Дня Русинох Румуниї увеличали предсидатель Шветовей ради РРЛ и Рускей матки Сербиї Дюра Папуґа з Руского Керестура, подпредсидателє РМ Владимир Дудаш з Руского Керестура и Миломир Шайтош з Нового Саду, як и член Управного одбору и портпарол РМ Мирослав Силадї з Вербасу. Тиж так, означованю ювилею присусатвовал и секретар Шветовей ради и предсидатель Русинскей оброди Словацкей Владимир Противняк, член Шветовей ради з Мукачова, зоз Закарпатскей обласци України Микола Бобинец, представитель Русинох з Ужгороду Валерий Падяк, та предстдативетель русинского здруженя з Москви, з Русиї, Михаил Дронов.
 

Пред дзешец роками, у Румуниї основане Културне здруженє Русинох Румуниї (КЗРР), зоз шедзиском праве у Деви, одкаль и його предсидатель, источасно и депутат у парламенту Румуниї и член ШР РРЛ Ґеорґий Фирцак. Снованє КЗРР представяло и одредзени препород Русинох у тей держави, постало член Шветового конґреса РРЛ, а попри коло 300 з тей нагоди позбераних Русинох, Шветочней схадзки Здруженя и Дню Русинох присуствовали и представителє державних орґанох Румуниї, та представителє других националних меншинох.
 

Окремни поздрави з боку предсидателя Румуниї Траяна Басескуа, присутним пренєсол Петер Екштайн Ковач, особни секретар предсидателя Румуниї, а слова почитованя и потримовки, Русином висловел и представитель Влади Румуниї и єй орґану за интеретнїчнии одношеня Атила Дежи.
Тиж так, ювилей и Швето прситним повинчовал и предсидатель Шветовей Ради РРЛ Дюра Папуґа, котри наглашел же єст ище вельо роботи на витворйованю правох меншинох, а у наступним периодзе, значне анґажованє потребне унапрямиц на дальше националне освидомйованє Русинох у Румуниї и других державох.
 

У тим напряме, Папуґа поволал же би ше у наступних пописох жительства, Русини вияшньовали як припаднїки тей меншини у шицких державох дзе жию, а у Румуниї попис жительства будзе отриман и 2012. року. Богату културно-уметнїцку програму виведли ансамбли домашнїх зоз Деви, Сиґету та Пераґу Маре, алє и госцуюци ансамбли з Подкарпатя (з Ужгороду и Мукачова) и зоз Словацкей (з Медзилаборцох). З тей нагоди, у голу Дому Култури, була поставена пригодна вистава пошвецена роботи Културного здруженя РР и його дотерашнїх публикацийох.
 

Публика барз емотивно привитала шицких бешеднїкох и ансамбли на Шветочней схадзки и културно-уметнїцкей програми и гоч велї тамтейши Русини, пре одредзени историйни причини, нє бешедую по русински, вєдно з виводзачами на сцени шпивали познати русински шпиванки. Означованє ювилею, алє и Дня Русинох Румуниї, представя и єден з резултатох упартей роботи Шветовей Ради РРЛ на витворйованю зарисованого - же би ше у каждей жеми дзе жиєме означовало швето Руснацох.
 

(конєц) сил/зам