Komentarj: Avtonomnŷj oportunista

Mnohŷ ukrajiňskŷ mediji, presovŷ agenturŷ pysaly o nedavnim pryjaťu pidkarpaťskŷch Rusyniv prezidentom Čes’koj republikŷ. Dokinc’a to malo i diplomatičnŷ konzekvenciji. Ne budu komentovaty to, što odbŷlo s’a v Prazi, no ne dasť mi ne daty voprosŷ jednomu iz komentatoriv toj podiji.

Oleksandr Havroš samosobov ne mih zistaty tycho i tradično na sajti Radija Svoboda, v rubrici Točka zoru napysav staťu v kotrij pyše o striči Miloša Zemana z Rusynamy. Napysav to v ramkach toj rubrikŷ, u kotrij redakcija zvertať pid každov staťov uvahu, že to pohľadŷ avtoriv i ona vlastno ne nese odpovidnosť za textŷ. No interesnŷm je, že odnosno Rusyniv s’a tam publikujuť lem pohľadŷ z jednoho boku – rusynofobnŷ.

Havroš s’a u stati zanymať i temov, vďaka kotrij Zeman pryjav Rusyniv – Čechoslovakijov. Kritikuje Masarika, Beneša, pyše o tim že Čechoslovakija bŷla fiasko, kotre bŷlo odsudžene na zanyknuťa jednako jak Soviťskŷj sojuz abo Juhoslavija. A davať i argumentŷ na svoji genialnŷ dumkŷ. Okrim inšoho pyše o zlij narodnostnij politici Prahŷ, pyše, že ne bŷv spovnenŷj mirnŷj dohovor, keď Praha ne dala „Zakarpaťu“ avtonomiju, i keď „Ukrajinci“ zistaly podilenŷ medži „Zakarpaťom“, Slovakijov i Rumunijov.

Ne budeme zoseredžaty s’a na slovnyku Havroša, bo zname, že vtohdŷ žadne Zakarpaťa ne bŷlo a mirnŷj dohovor pyše o Rusynach, ne o Ukrajinc’ach. Zname, že Havroš manipuluje, je to tak vse, je to joho modus operandi.

A teper’ povim, že hej, maje pravdu. Bŷla to chŷbna politika Prahŷ, keď ne vŷpovnyla obovjazkŷ odnosno Rusyniv i Pidkarpaťskoj Rusy, keď ne dala avtonomiju Rusynam, keď zemsku hranic’u ne zrobyla na osnovi etničnoho principu, jak to bŷlo obic’ane, i Rusynŷ zistaly rozdilenŷ v dvoch časťach Čechoslovakiji. No keď to Havroš znať, pak je interesnŷm, čom takŷj sam pohľad ne maje i na sučasnu situaciju.

Žŷteli Zakarpaťkoj oblasty predci u 1991-im roci holosovaly v pravno obovjazujučim referendumi i vŷrišŷly o tim, že choťať bŷty časťov novoj deržavŷ – Ukrajinŷ, no choťať bŷty avtonomnov oblasťov. Kyjiv tot obovjazok ne spovnyv dodnes’. Keď Havroš spomynať u svojich staťach vopros avtonomiji Zakarpaťskoj oblasty, vse lem negativno. Pyše o rusyňskŷch abo maďar’skŷch separatistach, o rukach Moskvŷ itd.

І tak ne zistavať inše, lem zvidaty s’a Havroša, že v čim je riznic’a medži tŷm, što ne dotrymala Praha i tŷm, što ne dotrymav Kyjiv. Keď bŷlo neudiliňa avtonomiji Prahov planov narodnostnov politikov, fiaskom, ne je neudiliňa avtonomiji Kyjevom toto same? Navece v prypadi, keď u 1991-im roci o tij avtonomiji holosovaly pr’amo ľudy? Što je vlastno vekše fiasko, i što je vlastno hirša narodnostna politika, keď Praha ščiro pidtrymovala i ukrajiňsku emigraciju v Čechoslovakiji, v Prazi maly Ukrajinci dokinc’a svoju univerzitu, ale dnes’ Rusynŷ na svojij vlastnij zemli ne suť any pryznanŷ za okremu narodnostnu menšŷnu i ne majuť žadnŷ prava, lem suť kriminalizovanŷ?

Oleksandr Havroš bŷ sobi mav peredumaty, što vlastno pidtrymuje. Keď je takŷj liberalnŷj u spravi avtonomiji i kritikuje, že Praha jej ne dala, pak naj dnes’ kryčiť do Kyjeva, žebŷ cholem tot vŷpovnyv voľu naroda. Ale mŷ zname, že to ne zrobyť. Bo Havroš je tipičnŷm oportunistom, kotrŷj robyť toto, „što treba“.

Prezident Zeleňskŷj s’a teper’ namahať zakinčity vojnovŷj konflikt i Kyjiv prystav na Štajnmajeriv plan. Tot rachuje z „okremŷm statusom“ pro Donec’ku i Luhaňsku oblasť. Rachuje z avtonomijov. Počekame, jak s’a do toj avtonomiji vŷrazyť velykŷj prychŷľnyk avtonomiji Oleksandr Havroš. Rachuju, že avtonomno oportunistično.

Staťa bŷla napysana jak komentar’ „Vstupne do kontroly“ lemkivskoho radija lem.fm.  

PETRO MEDVІĎ

Žridlo:
http://www.lem.fm/avtonomnyj-oportunista/

Foto:
Zeman: Rusíni jsou součástí naší historie
Zeman přijal 3. září na Hradě předsedu Světové rady Podkarpatských Rusínů Vasyla Dzhuhana. Rada sídlí v ČR.
https://www.novinky.cz