Kongres u juliju toho roku

Конґрес у юлию того року

Дванасти Шветови конґрес Руснацох/Русинох/Лемкох (ШК РРЛ) будзе отримани од 12. по 14. юлий того року, одлучене на остатнєй схадзки Шветовей ради (ШР РРЛ), хтора всоботу, 2. марца отримана у румунским городзе Дева. Спрам скорейших одлукох, Конґрес будзе отримани у України, у Мукачове и Сваляви на Подкарпатю, а тераз утвердзени и датум його отримованя. Як то узвичаєне, вєдно з Конґресом будзе отримани и Шветови форум РРЛ младежи, так же зашеданє шестого Форуму будзе 13. юлия, дознава Рутенпрес од предсидателя ШР РРЛ Дюру Папуґу.
 
Одредзене и число делаґатох и госцох, та кажда орґанизация-членїца на Конґрес делеґує по 10 делеґатох и по 5 госцох, а младежски орґанизациї по 5 делеґатох на Форум. На Конґрес будзе поволана и делеґация Зєдинєна Русинох з Москви, з Русиї, як кандидата за приєм до Шветового конґресу.
 
По 11. май, кеди плановане отримац ище єдну схадзку Ради пред Конґресом, праве у Мукачове, комисиї ШК РРЛ - за просвиту, културу, видавательство, историю и економски розвой - маю пририхтац звити о роботи медзи двома Конґресами, а на наступней схадзки Шветова рада утвердзи и кончєни Нарис статуту Шветового конґресу РРЛ.
 
Крем члена з Ческей и представителя Шветового форуму младих, на зашеданю Ради у Деви присуствовали шицки єй члени, як и члени Надпатраюцей комисиї - Мийо Шайтош з Горватскей и Иван Петрецки з Румуниї.
 
За главну редакторку глашнїка ШК „Гласу Русина" Рада всоботу меновала редакторку русинских новинох „Инфо Русин" з Прешова Силвию Лисинову, як и редакторох за жеми, односно орґанизациї-членїци, дзе за Сербию то будзе новинарка Радио Нового Саду Владислава Гарди. У тим року тиж плановане обявиц штири числа „Гласу Русина", а за средства знова конкуроване до компетентного министерства Словацкей Републики.
 
Шветова рада оценєла же пририхтованя русинских орґанизацийох за попис жительства у України иду у добрим напряме, а спрам нєурядових спознаньох, попис у України вироятно будзе у октобре/новембре того року.
 
На схадзки, Миломир Шайтош з Нового Саду, спред орґанизатора, членом Ради уручел пригодни дарунки з нагоди прешлорочного ювилею Руского фестивалу малих сценских формох, а члени Ради и други госци внєдзелю, 3. марца, участвовали на програми з нагоди Дня Русинох у Румуниї.
 
Програма Русинох у Румуниї отримана у месце Пожоґа, медзи Деву и Арадом, а попри спомнутого Шайтоша, котри и предсидатель Комисиї за културу ШК, на програми присуствовал и предсидатель Городского одбору Рускей матки Нови Сад Владимир Гаргаї, а обидвоме су и члени Управного одбору Рускей матки.

автор:  зам