Kosteľnikova ješeň

РУСКИ КЕРЕСТУР - Тогорочна Шеснаста "Костельникова єшень" будзе отримана през два викенди - 14. новембра, и од 20. по 22. новембер - заключене на вчерайшей схадзки Орґанизацийного одбору тей Културней манифестациї.

Орґанизацийни одбор за свойого предсидателя меновал Владимира Малацка, а вчера, 27. октобра отримана и порада о терминох и програмних змистох шеснастей "Костельниковей єшенї".

Тогорочна "Костельникова єшень" почнє 14. новембра зоз програму младих "Дньовка", цо и найвекша новосц у концепциї "Костельниковей єшенї".

Як заплановане, 14. новембра, у цалодньовей програми котру пририхтаю Пакт Рутенорум и ґимназиялци керестурскей Ґимназиї, будзе представена подобова, литературна, музична и филмска творчосц коло 50 младих творительох з вецей наших местох.

Централна манифестация тогорочней "Костельниковей єшенї" будзе отримана на пияток, 20. новембра у Руским Керестуре под назву "На чесц ювилейом".

Тот историйни и литературно-музични вечар будзе пошвецени 90-рочнїци од снованя Руского народного просвитного дружтва (РНПД) и 100-рочнїци од народзеня Михайла Ковача.

Попри окремного реферата, у рамикох тей манифестациї заплановане и представянє фото-документацийней вистави з нагоди ювилея РНПД, та представянє найновшей кнїжки академика Юлияна Тамаша "Евангелиста Михайло Ковач".

На тей програми буду представени и нови литературни твори Владимира Кочиша, з нагоди 60-рочнїци од його народзеня, як и Владимира Кирди Болхорвеса.

Истого дня, 20. новембра, алє през дзень, у керестурскей ОШиҐ, та керестурскей Дзецинскей заградки, буду отримани стретнуца з писателями и їх новима творами - Меланию Римарову, Серафину Макайову, Славком Винайом и Владимиром Кирдом.

На соботу, 21. новембра, буду отримани два традицийни манифестациї "Костельниковей єшенї" - у Кули (пополадню) Стретнуце рецитаторох з наших местох, а у Вербаше (на вечар) Стретнуце хорох з наших руских местох.

Шеснаста Културна манифестация "Костельникова єшень" будзе закончена на нєдзелю, 22. новембра у Коцуре, з пригодну виставу и литературно-музичним вечаром пошвеценим Гавриїлови Костельникови и двом спомнутим тогорочним ювилейом.

Вечар класичней музики будзе отримани на рок, понеже на схадзки Орґанизацийного одбору заключене же би ше тоту манифестацию отримовало каждого другого року.

(конєц) зам