Kračunska vinčovanka vladyky Gerogija Džudžara

Крачунска винчованка владики Георгия Джуджара
Владика Георгий: Христос Раждаєтся!
З нагоди Крачуна по Григориянским календаре, апостолски еґзарх за грекокатолїкох у Сербиї кир Георгий Джуджар упутює шлїдуцюцу винчованку:
- Рождество! Мистичне слово и назва подїї котра уж два тисячи роки зворушує людски души и шерца. Чловек, одушевени з подїю народзеня и приходу на тот швет Сина Божого, Исуса Христа, намага ше найсц одвитуюци пояшнєня тей чудесней подїї.
 
- Вшелїяк, то швето любови, любови Божей ґу чловекови. А за таке дацо нє досц лєм три днї швета. Прето свята Церква пририхтує нас през длугши час за стретнуце з народзеним Богом у людскей подоби, з Дзецком Исусом.
 
- Обчекованє народзеня Исуса - то образ возбудзеня укоренєтого глїбоко до християнскей духовносци и ровночасно до реалносци нашого християнского живота. Исусово народзенє за нас поволанка же бизме жили у нєпреривней повязаносци з новонародзеним Исусом. Святи апостол Павло надпомина: Будзце свидоми "хвильки же час вам зобудзиц ше зоз сна, бо нам тераз спашенє блїжей як кед зме поверели. Ноц преходзи, дзень ше приблїжує! Прето одложме дїла цмоти и облєчме ше до оружия шветлосци" (пор. Рм 13, 11-12).
 
- Шветло заблїсло нє лєм у вифлеємских яшелькох, алє и у людских душох, и нє лєм у душох, алє и у цалим швеце. Приход Божого Сина пременєл швет. То уж вецей нє стари, алє нови швет! Прето святи апостол Павло наглашел же ше приблїжує час спашеня, и християн ше нє шме препущиц стихийному цеку часу, вон треба же би ишол на стретнуце з Исусом. З поволанку "будзце будни и модлїце ше" у чаше пред Рождеством, свята Церква нас поволує и унапрямує ґу Исусови, котри приходзи. Ми поволани буц будни нє лєм чекаюци, алє и будуюци швет и усадзуюци до ньго евангелски одношеня медзи людзми. На таки способ ше будземе приблїжовац ґу Христови, котри приходзи.
 
- Християнска будносц муши буц стаємна. То нє физична будносц, алє будносц духа, будносц вири, будносц котра одруцує дїла цмоти; то стаємна борба процив гриха и живот у знаку народзеного Исуса Христа и Його Мена. То основни критерий нашого християнства, критерий интензитету Божого шветла, яке вибива з вифлеємских яшелькох и рефлектує ше на чловека.
 
- Рождество Христово - то сполнєнє людских мрийох и жаданьох. Исус ту, з нами, при нас, у нас. Од нас завиши як го дожиєме. З тим вельким шветом Народзеня Божого Сина и нашого Спасителя, жичим Вам полноту дожица народзеного Исуса и Його шветлосци у Вашим живоце!
Христос Раждаєтся!
Ваш владика + Георгий Джуджар

aвтор:  ртп