KREMINEC-2012:picicko soncja u kalamutňij voďi

КРЕМІНЕЦЬ-2012:піціцько сонця у каламутній воді

Участникы 5-го інтеррусинського фестівала  на горі Кремінець, што выше села Стужиця у самім центрі Ужанського природного парка, 14-15 юлія зажыли всякого: была туй и фізична змора, бо чотири годины путованя дгорі на самый верьх горы (1221 м понад ровінь моря), де ся сходят штатні границі Україны, Словакії и Польщі, то усе важноє выпробованя твого верьховинського характера и силы волі. Туй и радость стрічі из давніми цімборами из другых держав, але и з новыми приятелями, из котрыми дало ся файно побесідовати, заспівати народну співанку ай спечи кромплі и солонину. Туй и можность видіти впечатляющі полонинські пейзажі, што їх маестро-природа вымінёвала кажді півгодины: то нажене мрача, то вітром потрепле го на паздіря,  то назад хмариська, ладні урвати ся, притисне ид землі, то зась мало зашвінґлює и попустит – укаже вандровникам тепле літнє сонечко на фоні синёго неба. Вночи щасливых и змореных таборитів зась приспит дождь, монотонно дупкавучи кропками у стріху намета. А уж додня заґаздує сонечко, щедро загрівавучи видокруг...

Не было нас на Кремінці много, айбо не было и мало. Прийшли фестівалникы из Україны, Словакії и Сербії. За добров традиціёв підняли сьме прапоры карпатськых русинів и Європськой Унії. Орґанізатор акції – Закарпатськый благочинный фонд «Русинська школа» (Ужгород). Голова правліня – Dr Валерій Падяк CSc.

Русинськый писатель из Словакії, автор многых книг поезії и прозы, лавреат межинародной літературной ціны им. Александра Духновича Штефан Сухый забавляв участників історіями из свого жытя. Акурат на горі студент 3. рочника русинськой ґімназії у Руському Керестурі (Сербія) Мілан Падяк, котрый на Кремінці презентовав нове трічко про моложаву из написом «Русин» у стилі ґраффіті, необчековано туй стрітив свого керестурського учителя фізкултуры Славка Папа. На Кремінець назад не прийшли наші братя-лемкы, хоть и мали таке наміреня – ладили ся на фестівал. Спомянули сьме без них 65-у годовщину депортації русинів-лемків из Лемковины почас варварськой операції «Вісла».

Оваціями фестівалникы стрітили выступліня Петра Крайняка (мол.) як спеціалного заступці омбудсмена Словакії PhDr. Ласло Надя. П. Крайняк выголосив текст письма повноважного представителя влады Словацькой републікы за націоналні меншины Ласло Надя, адресованого участникам фестівала на горі Кремінець. У свому письмі омбудсмен почасти пише: «Vy, Rusíni, patríte do Karpát, ako prirodzená súčast` priestoru, ktorý sa rozprestiera na rozhraní dnešného Slovenska, Pol`ska a Ukrajiny. Tento priestor vždy patril Vám a pro mnohé stáročia ste tu spolunaživali s príslušníkmi iných národov a národností. Hora Kremenec, ako najvýchodnejší bod našej vlasti, je symbolom stretávania a spolupráce».

Тоты слова повноважного представителя влады Словацькой републікы за націоналні меншины Ласло Надя суть важнов оцінков пятьрічной роботы орґанізаторів фестівала – гора Кремінець стала єдным из новых сімволів єдинства карпатськых русинів.

Вертавучи ся домів, щасливі, понесли сьме на плечах пять нашых русинськых фестивалів на Кремінці, а кілько їх буде ищи?

П.В.