Krynica - Švetova rada

Будзе основана Асоцияция русинских новинарох

КРИНЇЦА - Под час отримованя Шестого биєнала русинскей/лемковскей култури у Кринїци, у Польскей, 23. мая отримане штварте, порядне зашеданє Шветовей ради Руснацох/Русинох/Лемкох (РРЛ).

Зашеданю Шветовей ради, котрому предшедовал єй предсидатель Дюра Папуґа з Руского Керестура, крем представителя з Горватскей, присиствовали шицки други члени того цела Шветового конґреса РРЛ.

Як Рутенпрес дознава од предсидателя Шветовей ради РРЛ и предсидателя Рускей матки Дюру Папуґу, єдно спомедзи значнєйших заключеньох на зашеданю у Кринїци то же пошвидко будзе основана Асоцияция русинских новинарох (АРУН) зоз жемох членїцох Шветового конґреса РРЛ.
Рада прилапела цилї и задатки будуцей Асоцияциї, а єй сновательна схадзка будзе отримана уж 26. юния у Медзилаборцох, у Словацкей, под час отримованя тамтейшого русинского Фестивала култури и спорту.

Сновательну схадзку пририхтаю Єлена Перкович зоз Сербиї, бувша редакторка нашого "Руского слова" и Рутенпресу, Силвия Лисинова, терашня редакторка новинох "Инфо-Русин" зоз Словацкей и Стєпан Лявинец мл., редактор часопису Русинох у Мадярскей "Русински швет" и буду єй присуствовац новинаре зоз шицких русинских медийох у Европи и Америки, медзи нїма и з нашей жеми.

На основи заключеньох з остатнього Конґресу, после зашеданя у Кринїци Шветова рада РРЛ ознова послала писмо предсидательови України, предсидательови Парламенту України и предсидательови Влади України у котрим ше од України вимага же би ше у наступним попису жительства Русином оможлївело так вияшньовац, же би ше им оможлївело витворйованє националного идентитету спрам Европскей повелї о националних меншинох, а глєда ше и же би найвисши державни орґани України прияли делеґацию Шветового конґреса РРЛ, гварел Папуґа за Рутенпрес.

З оглядом же на остатнїм Конґресу у Руским Керестуре за кандидата до Конґресу преглашена орґанизация Руснох з Москви, з Русиї - Русинске отечество Карпатска Рус, на чиїм чолє др Михаил Дронов, Шветова рада розпатрала звит о єй єднорочней и план роботи по наступни Конґрес, з цильом даваня препоруки о приєму тей орґанизациї до Конґресу. Конєчна одлука о тим будзе принєшена на схадзки Ради пред Конґресом, идуцого року.

Як гвари Папуґа, у орґанизацийох-членїцох Шветового конґреса почала розправа о предкладаню нового Статута Конґреса. Розправа тирва по конєц октобра и после даваня заувагох и предкладаньох, мала би буц закончена по початок новембра того року.

Члени Швцетовей ради упознати з пририхтованями за означованє националних шветох Руснацох/Русинох у жемох дзе жиєме, та так Дзень Руснацох у Горватскей будзе на ютре, 29. мая у Вуковаре, Дзень Русинох у Словацкей 4. юния у Прешове, Дзень Русинох у Мадярскей 5. юния у Мишколцу, Дзень Русинох у Румуниї 4. септембра, а Дзень Русинох у ЗАД и Канади 26. октобра у Питсбурґу.

Шлїдуюце зашеданє Шветовей ради будзе у Вуковаре и Петровцох, у Горватскей, 21. и 22. авґуста, дзе буду зашедац и два комисиї Конґресу - за образованє и за економски и привредни розвой.
Попри того, на схадзки у Кринїци, Шветова рада РРЛ бешедовала и о пририхтованю окремней публикациї о до тераз отриманих 10 Шветових конґресох РРЛ и 4-ох зашеданьох Шветового форума младих РРЛ, котри у електронскей и друкованей форми вида Шветови форум младих, а публикация би мала буц закончена по Єденасти шветови Конґрес РРЛ, на рок у Мадярскей, гварел за Рутенпрес Дюра Папуґа.

(конєц) зам