Lemkivsky cerkvy na Lysti JUNESKO (UNESCO)

Лемківскы церкви на Листі ЮНЕСКО

В червци 2013 рока на Листу світовой спадковины ЮНЕСКО остало вписаных 16 деревяных церкви з польской і украіньской обшыри Карпат. Церкви обняты остали вынятковом охороном зо взгляду на іх велику культурову і архітектонічну вартіст.

Впис на Листу обнял по вісем храмів з Польщы і з Украіны, з чого пят находит ся на Лемковині: церков пп. Св. Михаіла Архангела в Туряньску, церков пп. Св. Якова Молодшого Апостола в Поворознику, церков пп. Св. Параскєвы в Квятони, церков пп. Св. Михаіла Архангела в Брунарах Выжніх, церков пп. Покровы Пресвятой Богородиці в Овчарах (колиси Рыхвалд).

О впис церкви на Листу перез рокы старал ся з польской стороны Народовий Інститут Спадковины, а з украіньской - Державний Історично-Архітектонічний Резерват з Жулкви і Науково-Дослідничий Інститут Баданя Забытків в Кыйові.

2 грудня того рока одбуде ся торжественне вручына завідательом об'єктів специяльных дипломів посвідчаючых впис новых місц на Листу світового дідицтва ЮНЕСКО.
Імпреза одбуде ся в Сенаторскій Сали Королівского Замку на Вавелю. Вступ лем за запрошынями.

Проґрам обыймує м.ін. презентацию вписаных об'єктів, вручыня дипломів, оказийны выступліня і концерт ансамблю Журавлі.
 

нм
 

Zdroj: http://www.lem.fm/lem/news/lemkivsky_cerkvy_na_lysti_junesko,212