Ľubľu žyti v Myrošovi, bo tu ľude dobry...

,,Люблю жыти в Мирошові, бо ту люди добры“…
Емотівны   вступны слова суть вынятком  з мирошівской гімны ,,Зашвіт солнце“, котры одзвучали премєрово  на юбілейнім 20-ім рочнику русиньскых културных славностей  в селі Вышній Мирошів свідницького окресу. Але подьме попорядку! Прекрасна хвіля притягла много людей іщі до прекраснішого  села Вышній Мирошів, котре  находить ся в северній части Низкых Баскідів приближні 13 км од Свідника і 23 км од Бардейова.

В сучастности в селі  жыє 569 жытелів, про котрых  святочна послідня авґустова неділя (29.8.2010) была досправды святочнов! Бо в тот день містны жытелі пережывали три великы  юбілеї вєдно. Першым быв уж спомянутый  20-ый рочник русиньскых културных славностей, де  в  културнім проґрамі  выступило много фолклорістів, як: ДФК Маковичка, ФК Маковиця  зо Свідника, популарне дуо Сівулькова - Караш з Камюнкы, домашня ЖСҐ, ці пряшівске тріо Ліґа – Салока - Чума (в приватнім жывоті склад тріа творив: прокуратор, бывшый діректор умелецькой школы і поліціста) за гармонікового допроводу Мілана Ґарберы.  Може многы з вас, котрым  мено   ЮДр. Андрія Ліґы знакоме, то собі теперь істо подумате, же мы  змылили ся в тім, же як раз він выступив як співак в  уж спомянутім пряшівкім тріу. Но опак є правдов,  бо хоць  А. Ліґа є знамый в першім ряді  як некомпромісный  бойовник за  принавернутя Руського дому в Пряшові, ці уж спомянутый і барз узнаваный  пряшівскый  прокуратор, або член Містной орґанізації Русиньской оброды в Пряшові, так його співацькый талент, міцне чутя к родному русиньскому селу Вышній  Мирошів лем потверджують його універзалность,  котра є  великым доказом  того, же ани одлука од дому, ці велика занепразненость  не позволяють   забывати на русинство. Тото  потведрив і премєрово в мирошівскій гімні Зашвіт солнце, котрой він і Ш. Сухый суть авторами і котру музычно обробив Мілан Ґарбера. Подля слов автора гімны А. Ліґы ,, слова в гімні суть чісто Мирошівскы, наприклад, в селі  не гварить ся, же находжу ся в Мирошові, але Гмирошови,,.  

Гімна прозвучала премєрово на акції в подобі співу самого автора, котрый ведно з Лукашом Ґарбером (котрого бабка походить тыж з Мирошова) за гармонікового допроводу Мілана Ґарберы дословні выкликали  домашню публіку к емотівным слызам, ,,стендинк евейшн,,  і великому аплавзу. Далшый юбілей мирошівчани прожыли в подобі крещіня  публікації під назвом Вышній Мирошов, котрой славностне покрещіня одбыло  ся як раз уж  на спомянутій славностній акції в  самім вступі.  Значіть, новонароджена публікація є далшов  вызначнов подійов про Мирошанів, бо книжка такого характеру іщі о селі не была надрукована. А кідь споминаме цілый час талент нашого прокуратора і жертовного Русина А. Ліґу, так наконець уведеме іщі найвекше ,,бінґо“ a то, же автором высше уведженой публікації о селі Вышній Мирошів є сам А. Ліґа, котрый за помочі містных жытелів, но главні Михала Петріка написали таку інересну публікацію. Подрібнішый обсяг публікації уведеме в далшім чіслі, но теперь іщі  треба додати, же подля слов автора, книжка завитать до каждого дому во Вышнім Мирошові, а то цалком задарьмо!

Славностного крещіня публікації на мирошівскім амфітеатрі,  окрем автора і сполуавтора,  брали участь:  старостка села   Міліца Цоцульова, отець духовных Александер Клебан, котрый до публікації спрацьовав  Мирошівскый літопис і Іван Чіжмар, котрый приготовив інтересне ДВД, котре буде неодільнов частьов публікації. Уж теперь вам прозрадиме, же на нім находять ся автентічны  звуковы награвкы співів  з Вышнього Мирошова іщі з 60-тых років.

 

С. Лисінова