Maďarska - nacionalni menšiny

У одношеню на скорейши роки то барз вельке звекшанє, понеже на попису жительства з 2001. року, як Русини ше вияшнєли лєм 1 100 особи; 1998. р. у Мадярскей були орґанизовани лєм 10 русински меншински самоуправи, а 2002. р. 32, цо було пороснуце за 220 одсто.  На предостатнїх виберанкох за русински меншински самоуправи 2006. р., були уписани 2 730 Русини, так же були орґанизовани 52 меншински самоуправи по реґионох и местох у Мадярскей. На тогорочних виберанкох 4 228 Руснаци виберали по штирох депутатох до 75 меншинских самоуправох, так же вибрани 300 депутати, котри у януаре наступного року буду виберац 25 членох Вседержавней русинскей меншинскей самоуправи, як найвисше цело на уровню держави.

Тиж так, у януаре буду отримани и виберанки за Главногородску русинску меншинску самоуправу од 7 членох (у Будапешту), як и за седем членох Русинскей меншинскей самоуправи у Жупаниї Бордош-Абуй-Земплин. Спрам спомнутого закона, своїх кандидатох мали право кандидовац национални цивилни орґанизациї, так же на виберанкох участвовали 5 орґанизациї и здруженя Русинох у Мадярскей - самостойно, лєбо у коалицийох.

Найвецей депутатох у 75 русинских меншинских самоуправох освоєла Орґанизация Русинох/Рутенох Мадярскей (ОРРМ) - 120 самостойних, од 167 кандидатох у 35 местох и ище 4 депутатох вєдно зоз Здруженьом "Будителє". ОРРМ настала з бувшого ОРУМ-а, Ґабриєла Гатинґера, як и орґанизация "Єдинство Русинох малих реґионох" (ЄРМР). Праве ЄРМР друга орґанизация по числу депутатотх - 108, од 163 кандидатох котрих мала у 36 местох. На трецим месце по числу освоєних депутатских местох коалиция Вседержавного здруженя русинскей интелиґенциї "Антония Годинки" (ВОРИАГ), котрому на чолє др Антоний Лявинец и Здруженє русинскей култури (ОРК), на чолє з Олґу Силцер Ликович. Вони маю 65 депутатох од 79 кандидатох, котрих мали у 20 местох. Попри спомнутих заєднїцких штирох депутатох, Здруженє "Будителє", котрому на чолє Тибор Миклош Попович, достало и єдного самостойного депутата. Тото Здруженє на виберанкох мало 6 кандидатох у двох местох.
 

У поровнаню з 2006. роком, звекшанє особох котри ше вияшнєли як Руснаци за 44,23 одсто, та єст вигляди и наздаваня же ше так, як Русини, вияшня и на будуцим попису жительства у Мадярскей, 2011. року.
 

шля/зам