Mladi oformja svoju listinu za viberanki

 

Млади оформя свою лїстину за виберанки

 

Члени Одбору за младеж и спорт НС на вчерайшей схадзки

На наиходзацих виберанкох за нови Национални совит (НС) Руснацох потребне же би млади участвовали у цо векшим чишлє - гварене на вчерайшей схадзки Одбору за младеж и спорт Националного совиту, и заключене же треба информовац шицких младих Руснацох о значносци їх упису до окремного виберацкого списку, о гласаню на виберанкох, як и о оформйованю окремней лїстини младих за участвованє на виберанкох за Национални совит. На лїстини треба же би було найменєй седем, а найвецей 19 полнолїтни особи, алє о конкретних менох на будуцей лїстини вчера нє бешедоване.

 

Анализуюци активносци медзи двома схадзками, члени Одбору на вчерайшей дванастей порядней схадзки, отриманей у просторийох НС у Руским Керестуре, констатовали же спомедзи планованих, до тераз витворени лєм проєкти младежи у Дюрдьове и 2 турнири у рамикох Спортских бавискох "Яша Баков" - у Дюрдьове и Керестуре. Планує ше же до конца рока будзе реализована векшина проєктох за хтори Одбор одобрел средства.

 

По финансийним планє за 2014. рок Младежскей орґанизациї Руского Керестура "Пакт Рутенорум" були наменєни вєдно 150 000 динари за "Водова фест", Медзинародни волонтерски камп и "Дньовку". У медзичаше "Пакт Рутенорум" претаргнул тогорочни активносци, так же орґанизацию Медзинародного волонтерского кампу и "Дньовки" у тим року превжало Туристичне здруженє "Руски Керестур". Прето Одбор єдногласно принєсол одлуку же би ше средства за тоти два проєкти, односно 100 000 динари, преруцело на рахунок Туристичного здруженя, а 50 000 динари останє "у резерви".

 

автор:  сен