Mladi Rusnaci nedosc ukľučeni do Javnej rozpravy

Млади Руснаци нєдосц уключени до Явней розправи
Явна розправа о Нарису Стратеґиї вчера отримана у Новим Садзе
У Руским културним центре вчера отримана Явна розправа о Нарису Националней стратеґиї Руснацох у Сербиї по 2020. рок. На новей сесиї участвовали коредакторе Нарису Михайло Катона и академик Юлиян Тамаш, як и предсидатель Националного совиту (НС) Руснацох Славко Рац, котри гварел же, понеже ше 2. новембра наполнєло дзешец роки од снованя Першого националного совиту, нєт лєпшого способу за означованє ювилею од приношеня Националней стратеґиї, хтора дефинує интереси Руснацох у шлїдуюцих 10 рокох пред нами.
 
- Нє маме комоцию дзелїц ше и надалєй, бо Руснацох з каждим дньом єст вше менєй, алє ше у виробку Стратеґиї мушиме позберац коло заєднїцких цильох нашей заєднїци и источашнє дошлєбодзиц каждому же би ше чувствовал як Руснак, без огляду хтора му опция блїзша - гварел предсидатель НС Славко Рац.
 
Вон тиж визначел же квалитетна Стратеґия оможлїви континуитет нашого нацоионалного живота и политики, же би кажди нови национални совит нє рушал вше од початку, цо ше случовало остатнї 10 роки.
 
Академик Тамаш ознова повторел же Нарис Националней стратеґиї, док будзе закончени, будзе политични документ фундаментовани на фактох хтори, у комуникациї Националного совиту Руснацох, як леґитимного партнера держави у обласцох и инґеренцийох цо су му зоз Законом зверени, держави у найкратшим одвитує на питанє „Цо ви, Руснаци, сцеце?"
 
Предсидатель НСР Славко Рац и кооредакторе Нарису Катона и Тамаш ище раз поволали руску явносц же би шицки суґестиї и конструктивни критики на терашнї текст, по 1. децембер у писаней форми послали на е-адресу rusovit@open.telekom.rs а Роботне цело, у хторим авторе шицких сеґментох Нарису, анализує дополнєня и предкладaня. Академик Тамаш гварел же кажда одлука Роботного цела о тих материялох будзе явна и арґументована.
 
Михайло Kатона тиж гварел же циль Стратеґиї то дефинованє интересох, приоритетох и способу справованя рускей националней заєднїци у новим дружтвеним амбиєнту. Насампредз то образованє, понеже то єдина нам доступна драга як нашо людзе нєшка можу обезпечиц еґзистенцию. Як гварел - лєм материялно обезпечени чловек може буц нєзависни и нєусловени, односно, у нашим случаю, може буц и остац Руснак. З того становиска виходзи и шлїдуюци циль Стратеґиї - мотивованє младей популациї на активованє и преберанє одвичательносц у руских „националних стварох".
 
Сход у Руским културним центре бул добре нащивени, а попри предкладачох Нарису Стратеґиї були и чолни особи векшини наших институцийох, но знова виостало присуство векшого числа младих. Тот проблем, обачлїви од початку Явней розправи, вечар окреме достал на значеню, понеже Нови Сад єдини руски штредок дзе число наших людзох рошнє, а популация преважно млада.
 
Озда и єдине становиско о хторим ше шицки учашнїки явней розправи вчера зложели - то же Национална стратеґия Руснацох полни смисел достанє лєм кед ше до єй витворйованя уключа млади.

-саб-