Moskva: Knižka o jaziku Rusnacoch u Serbiji i Horvatskej

 

Кнїжка о язику Руснацох у Сербиї и Горватскей
Того мешаца, у подмосковским городзе Щолково, вишла наукова моноґрафия филолоґа Вячеслава Чарского “Руски язик Сербиї и Горватскей у швеце язикових контактох: линґвоґенетични аспект”.
Чарски за русийски виданя написал вецей озбильни статї пошвецени рускому язику - насампредз його ориґиналней бачванско-сримскей вариянти, такволаней южнорускей. 
Концом 2008. року, на Филолоґийним факултету МҐУ з меном Ломоносова, одбранєл и кандидатску дисертацию, дзе основа його кнїжки була праве тота тема.

Окрем уводу, заключеня, библиоґрафиї и списку жридлох, у кнїжи пейц поглавя -  Проблем ґенези южноруского язика и драги ґу його розришеню, Теория и методика виглєдованя южноруского язика у швеце ґенетичней контактолоґиї, Медзиязикова релевантносц и линґвоґенеза южноруского язика, Ареална релевантносц и ґенеза южноруского язика и Знукаязикова восточнословацка релевантносц и локализация диялектней бази южноруского язика.

Значне дополнєнє кнїжки и шейсц  мапи, хтори направел особнє Чарски, вєдно зоз супругу Александру. О фундаменталним характеру моноґрафиї, шведочи и єй обсяг на 347 бокох.              
Як нєсподзивани резултат його виглєдованьох було одкрице ридкей повязаносци  южноруского язика зоз штреднєсловацкима бешедами Гемера.

Окрем професора Константина Лифанова, хтори Чарскому бул ментор, у виглєдованьох му помогли и роботи наших науковцох-линґвистох и других - др Юлияна Рамача, др Михайла Фейси, мр Гелени Медєши, мр Анамариї Рамач, Славка Ороса, як и др Душанки Мирич зоз Сербиї, та др Ани Плишковей, др Юрия Ванька зоз Словацкей и других.

(конєц) бхц