Možeme jim virýtý?

Važeny čitatele, Rusýny,
skoro po 80 - ročnij prestavki, na Slovensku by už mala konečni prýtý kompletna normalizácia v nazývani i identýfikáciji rusýnskoj istoriji i kultury. Bo dokolý iši? Narušiňa normalnoho vyvoja identifikáciji rusýnskoj istoriji i kultury sja začalo vznýkom Komunistickoj strany Ukrajiny i Komunistickoj strany Československa zato, bo toty politicky strany prý svojim vznýku prijali uznesiňa, že Rusýny sja budut nazyvatý Ukrajincjamý a nýjake inšenazvaňa Rusýniv nebude povolene. Tak sja aj stalo. Anomalija v identýfikaciji Rusýniv v serednij Evropi častočni skinčila svoju puť vďaka oficijalnomu anulovaňu vedučoj ulohy komunistickoj strany, okrim Ukrajiny, de Rusýn iši furt nemat svoji ľudsky prava, je bezpravnym občanom na svojij zemli, kotromu nedovaľat sja hlasýtý gu materýnskij rusýnskij narodnosti. Musýt sja pýsatý Ukrajincjom abo dajakym inakšym lem ne Rusýnom.

Teper sja pýše 2005 rik a v štatnim narodnostnim muzeju u Svýdnýku je iši furt uplatňuvana nedemokratý cka, protirusínská ideológia - „Rusýny sut Ukrajinci“. V tim duchu doteper je zrjadžena i expozýcija i nazva svýdnýckoho muzeja v kotrim urjadnym jazykom je slovenčina i ukrajinčina, chocj exponaty v muzeju sut šytky rusýnsky. Kodýfikovanyj rusýnskyj jazyk sja tu nerešpektuje. Ukrajinskyj literaturnyj jazyk v muzeju sja považuje za literaturnyj jazyk Rusýniv. Požadavka Rusýniv na sebeidentýfikaciju v muzeju byla vyrišena prýdaňom „pomlčky“ i slova „rusínsky“. Nazva „Múzem ukrajinsko-rusínskej kultúry“ bisiduje zavšytko.

V skutočnosti takoj kultury nebylo, neje i nebude. V sučasnosti existuje Komunisticka strana Slovenska, kotra kandiduje u voľbach i choče zastupuvaty našy interesy v samospravnych i štatnych organych, prosýme sja: „Pokračuje sučasna Komunisticka strana Slovenskoj republýky v ukrajinizaciji Rusýniv, abo uznavat Rusýniv jak samostatnu narodnostnu, istoričnu i kulturnu kategoriju, kotra mat rovnaky prava na sebeidentýfikaciju jak ostatni narody i narodností v Slovenskij republýki?“ Tak sja Komunistickoj strany Slovenska už davno trebalo oficijalni i verejni oprosýtý i žadatý napravu spravených chyb v jich narodnostnim programi, ked do teper sja už tak ne stalo. Budeme moči pročitatý v našych novýnkach InfoRusýn, Narodny novýnky abo Rusýn, či na interneti Rusýn voprosy i odpovidi KSS na temu Rusýnskoj političnoj identity na Slovensku? Kolý? Nadijme sja, že od sučasnoj Komunistickoj strany Slovenska Rusýnam na Slovensku nehrozýt ukrajinizačna narodnostna politýka. Tak možeme komunistam virýtý abo ne?

Jak zme sja doznalý z časopýsu Rusýn i Narodnych novýnok v SDKU lidriv otec, Dzurinda, za totality terpiv pro rusýnsku ideju, bo v časi ukrajinizaciji napýsav virš Rusýnska zorja. Takomu lidrovi možeme virýtý i spolupracuvatý z ným, što vy nato, panove čitatele rusýnskoj presy, povidate? Ne je to jedna z priorit rišiňa rusýnskoj politickoj identity na Slovensku? My to považujeme za rusýnsku, politicku prioritu. Blýžat sja voľby a my by zme malý matý jasno koho by trebalo volýtý a koho sja mame zbytý, žeby nam nepoškodýl, ked dostane politicku vladu do ruk. Nemalý by zme volýtý vovka v baranim kožuchu. Nevozjmut nam, Rusýnam, komunisty, ked sja dostanut do vlady, šytko, što nam doteper demokratýckyj štat vernul nazad? Nepidut po slidach svojich predkiv? Dobri zname, že mame u Svýdnýku i štatnyj muzej rusýnskoj istoriji i kultury, i rusýnsky exponaty sut v nim, i rusýnsky ľude v nim robľat, lem tot muzej sja čomskaj iši furt nazyvat i robýt v duchu protýrusýnskoj, nedemokratýckoj, komunistickoj ideologiji, ktora už je moralni perekonana i zastarala. Tak isto je moralni zastarala i expozýcija muzeja i robota muzeja a to lem zato, bo dumaňa sučasnoho vedžiňa SNM-MURK u Svýdnýku je moralni zastarale i na hnešňu dobu nepoužyteľne. Bude sja KSS i SNM – MURK u Svýdnýku dakolý normalizuvatý abo ne? Možeme jim virýtý? Chto jim pomože prý normalizaciji? Mohly by našy redaktore sja oprosýtý pred stavýteliv KSS i SNM-MURK jaku majut predstavu o spoločnim žyvoti z namý, Rusýnamý? My chočeme znatý s kym žyjeme v našim regioni.

Okresna organizacija Rusýnskoj obrody u Svýdnýku