Mudrosť, pravda i krasota staroby

I tak by mož bylo nazvaty interesnu vystavu fotografij Danky Kapraľovoj, vernisaž, kotroj sja odbyla 23. oktobra 2008 v Šarišskij galeriji (ŠG). Vystavu vjedno s avtorkov zorganizuvaly Združinja inteligenciji Rusyňiv Sloveňska (ZIRS) i Šarišska galerija v Prjašovi. I zato všytkych učastnikiv vernisažy, a bylo jich nevrokom, privytala domašňja pani Marta Hrebičkova, direktorka ŠG, kotra interesnov formov predstavila našu rusyňsku fotografku Danku Kapraľovu, kotryj pry ťi nahoďi predav krasnu buketu kviťja organizator akciji Jan Lypyňskyj, pidpredseda ZIRS. Veselym i temperamentnym spivom poťišyly učastnykiv vystavy chlopci z prjašivskoho FS Šariš – Lukaš Garbera, Vladymir Barej a Marek Greš, za harmoňikovoho doprovodu Milana Garbery.

Je malo molodych ľudej, kotry by sja pozeraly na starobu očamy a sercjom Danky Kapraľovoj. Každa jej fotografija jesť čims charakterna, hlubokodumna a pryťjahuje ne lem pohľjad čolovika, ale nutyt ho zadumaty sja nad vyobraženov situacijov nad žyvotom i cilov ľudskov existencijov. Mnoho napovidať i nazva vystavy Zuzanka – Pomož, Bože, rano vstaty. Staroba čolovika minyť hlavňi fizično, no duša nestaryje. Ne jeden čolovik ľihat večir do posteli iz slovami: „Pomož, Bože, rano vstaty.“ Jak na vystavci povila i sama avtorka, že staroba zminyla sylu a voľu čolovika na poľihovaňja i posidkovaňja, ale vyčistyla ho i od toho plaňšoho nerozumnoho, ostala v nym mudrosť, pravda i krasota. A toto je hlavna ideja vystavky Danky Kapraľovoj, kotru možete viďity v Šarišskij galeriji v Prjašovi do 7. novembra 2008.

A. Kuzmjakova, infoRusyn (zkorotšane)