NA 9.ZAŠEDAŇU ŠVETOVEJ RADY RUSINOCH UTVERDZENA PROGRAMA XIII ŠVETOVEHO KONGRESU RRL

 

НА 9. ЗАШЕДАНЮ ШВЕТОВЕЙ РАДИ РУСИНОХ (РУСНАЦОХ/ ЛЕМКОХ) 2. МАЯ У БУДАПЕШТУ УТВЕРДЗЕНА ПРОГРАМА XIII ШВЕТОВОГО КОНҐРЕСА РРЛ

 

На 9. зашеданю Шветовей ради Руснацох (Русинох/ Лемкох), хторе отримане 2. мая у Будапешту у Мадярскей, утвердзена програма роботи Тринастого Шветового конґресу Русинох/ Руснацох/ Лемкох, як и Седмого Шветового Форуму русинскей младежи, хтори 19. и 20. юния того року буду отримани у Деви, у Румуниї. На схадзки у Будапешту присуствовали дзевец з дзешец членох Шветовей ради РРЛ, а предшедовал предсидатель Шветовей ради РРЛ Дюра Папуґа. Як госц на 9. зашеданю ШР РРЛ участвовал Милан Мнягоньчак, нововибрани предсидатель Русинскей оброди у Словацкей.

 

Догварене же з каждей членїци Шветового конґресу РРЛ на XIII ШК РРЛ буду участвовац по 10 делеґати, як и по 5 делеґати на VII Шветовим Форуму русинскей младежи, а пре огранїченосц средствох домашнїх, на тим Шветовим конґресу РРЛ членїци нє буду мац и госцох, як то було на скорейших. Догварене же, по узвичаєней пракси за конґреси, дзешец госцох з цалого швета повола предсидатель Шветовей ради РРЛ.

 

На пленарних зашеданьох наступного Шветового конґресу РРЛ, медзи иншим, будзе розпатране предкладанє Преглашеня делеґатох XIII Шветового конґреса РРЛ о актуалним стану и обставинох медзи Русинами на Подкарпатю и у України, як и о потреби припознаваня Русинох у України за окремну народносц, односно меншинску националну заєднїцу, а плановане и отверанє поступку приношеня гералдицки прилаплївим гербу Шветового конґресу РРЛ. На другим пленарним зашеданю XIII ШК РРЛ будзе розпатране и предкладанє о приєму русинскей орґанизациї з Русийскей Федерациї до Шветового конґресу РРЛ, Як и на скорейших, и на Тринастим Шветовим конґресу РРЛ делеґати буду робиц и у 6 конґресних комисийох: за просвиту, културу, информованє и видавательну дїялносц, за историю Русинох, за Статут ШК РРЛ, як и за медзисобне сотруднїцтво членских орґанизацийох ШК РРЛ и туристични розвой.

 

На концу Тринастого Шветового конґресу РРЛ будзе вибране и нове зволанє Шветовей ради РРЛ. На отвераню XIII Шветового конґресу РРЛ будзе отримана шветочна културно-уметнїцка програма пошвецена 15-рочнїци роботи Културного здруженя Русинох Румуниї, домашнього того Шветового конґресу РРЛ, дзе плановани и привитни слова представительох державних орґанох Румуниї.

 

На тей шветочносци будзе уручена и Награда ШР РРЛ „Василь Турок Гетеш”, а тогорочни добитнїк етноґраф, фолклориста и музиколоґ Иван Чижмар зоз Свиднїку, зоз Словацкей.

 

Одлуку о добитнїкови Награди принєсла Шветова рада РРЛ на предкладанє Комисия за културу ШК РРЛ, хтора под предшеданьом Миломира Шайтоша з Нового Саду тиж 2. мая зашедала у Будапешту.

 

На 9. зашеданю Шветовей ради урядово винєшена и кандидатура Дружтва Руснацох „Руснак” з Петровцох, з Горватскей, за домашнього 14. Шветового конґресу РРЛ 2017. року.

 

дюп