Na kvitnu u Kocure bula polna cerkva

На Квитну у Коцуре була полна церква

Вчера коцурски грекокатолїки преславели Квитну нєдзелю, спомин на дзень кед Исус Христос вошол до Єрусалиму, дзе го дочекали тоти котри верели же вон Син Божи и махали му з палмовима конарами.
 
Служби Божо служели коцурски священїки - парох о. Владислав Рац и капелан о. Алексий Гудак и у шицких службох було вельо вирних, вельо вецей як остатнї роки.
 
По законченю каждей служби вирним дзелєни ошвецени багнїтки, а по словох церковних одборнїкох, того року подзелєни прейґ 2 тисячи 500 багнїтки, цо тиж вельо вецей як остатнї роки.
 
У каждей служби єден паноцец споведал, а як гварел парох о. Владислав Рац, вирни ше пред Вельку ноцу годни висповедац по стреду вечар у Преосвященей, а познєйше и у Майове служби

ВЕРБАС - У старовербаскей парохиї Покрова Пресвятей Богородици и нововербаскей церкви Святого Владимира вчера, по Юлиянским календаре преславена Квитна нєдзеля.
 
У церкви у Старим Вербаше Мала служба Божа була на 8 г., Велька на 10, хтору служели парох о. Юлиян Рац и о. Роман Кандрач, а на концу Служби пошвецени багнїтки, хтори парохиянє однєсли до своїх домох.
 
Под час Служби пошвецени и криж - дарунок фамелиї Ясмини и Светислава Долапчев, як подзекованє Господу Богу, алє и церкви и покойней мацери Амалиї. После Служби у одборнїци була закуска за шицких парохиянох, хтору орґанизовала фамелия Долапчев.
 
О. Зиновий Вовк Службу Божу у нововербаскей парохиї служел на 9 годзин, а як и у Старим Вербаше, на служби було вельо парохиянох. По служби благословени багнїтки, було мированє и споведз.

ШИД - На вчерайшей служби Божей на Квитну нєдзелю у церкви Преображеня Господнього у Шидзе, парох о. Михайло Режак пошвецел багнїтки хтори потим достали шицки вирни, а було их вецей як звичайно.
 
У казанї о. Режак визначел значносц багнїткох, односно кед людзе з палмовима конарами витали Исуса на уходзе до Єрусалиму.
 
Служби Божо з пошвецаньом багнїткох служени и у наших церквох у Бачинцох, Бикичу и Беркасове.