Na manifestaciji Dňi macerinskoho predstaveňi jazik vojvoďanskych Rusnacoch

У рамикох традицийней манифестациї "Днї мацеринского язика" вчера вечар у Городскей библиотеки Нового Саду, директор тей установи Драган Коїч привитал представительох рускей литератури и наявел промоцию кнїжки Миколи Шанти "Откриванє швета".

Манифестация "Днї мацеринского язика" у цеку того тижня у организациї Городскей библиотеки новосадскей публики представена литература на мадярским, румунским и словацким язику. Вчера на истим месце о меншинских язикох и автентичносци литератури котра ше пише на мацеринскей бешеди уводне слово дал акедемик Юлиян Тамаш.

О вибору поезиї Миколи Шанта котра преложена на сербски язик и друкована є у кнїжки "Откриванє швета" бешедовала Даница Вуйков, прекладателька Шантовей поезиї визначуюци даскельо антологийни писнї котри тот автор написал.

Др Стеван Константинович бешедуюци о Шантовей творчосци наглашел же вон єдини остал зоз своєй генерациї поетох котри и нєшка пише и же мож очековац же вон свою литературу заокружи нє лєм зоз поетскима алє и прознима творами.

Видавач кнїжки "Откриванє швета" Новинско видавательна хижа "Руске слово" а єй друкованє помогнул Покраїнски секретарият за културу.

Програму котра вчера вечар отримана у Гордскей библиотеки у Новим Садзе прикрашел и студент Академиї музичней уметносци, гитариста Дмитрий Цап.

У рамикох манифестациї Днї мацеринского язика, нєшка у Городскей библиотеки будзе представена литература на сербским яазику а на соботу 5. децембра , остатнього дня представяня литератури националних заєднїцох у Войводини госци буду представителє ромскей заєднїци.

(конєц) єп