Nacionalna strategija Rusnacoch

НАЦИОНАЛНА СТРАТЕҐИЯ РУСНАЦОХ

РМ почала явну розправу

Руска матка (РМ) ше у наступних двох мешацох активно уключи до явней розправи о Нарису националней стратеґиї Руснацох у Сербиї по 2020. рок, догварене на схадзки Управного одбору (УО) Матки, хтора пияток, 5. октобра отримана у Руским Керестуре.

Попри датого Нарису националней стратеґиї, на УО Матки догварене же основи за явну розправу у орґанох РМ буду и Огляднуце Мирослава Силадя на Нарис националней стратеґиї, цалком нове Предкладанє Нарису националней стратеґиї Руснацох Михайла Катони, та Заключеня зоз Штвартей схадзки подписнїкох Протоколу о очуваню руского язика, вязани за Нарис националней стратеґиї Руснацох.

Явна розправа будзе отримана у штирох одборох за фахову роботу РМ, як и у месних одборох у Коцуре, Вербаше и Кули, та Городским одборе у Новим Садзе и Реґионалним одборе РМ у Шидзе. Розправа будзе отримана по 5. децембер, та спомнути одбори поволани же би виплановали термини за отримованє явней розправи. 

Нарис националней стратеґиї, Предкладанє Нарису националней стратеґиї Руснацох Михайла Катони и Огляднуце Мирослава Силадя уж длугши час мож найсц и опатриц на веб-сайту Националного совиту Руснацох – www.rusini.rs ,  а пошвидко там буду положени и Заключеня зоз Штвартей схадзки подписнїкох Протоколу о очуваню руского язика. 

(конєц) зам