Nacionalne šveto Rucnacoch

По першираз у историї, ютре, 29. мая, будзе означени Дзень Руснацох у Републики Горватскей, а шветочносц будзе отримана у Вуковаре.

Инициятор означованя Дня Руснацох Горватскей Координация руских радох, главни орґанизатор Городска рада рускей националней меншини Вуковар, а покровитель того першого означованя Дня
Руснацох будзе предсидатель Горватскей Иво Йосипович.
За свойо Националне швето, Руснаци у Горватскей вибрали 25. май - дзень кед 1836. року основана грекокатолїцка парохия у Петровцох, и тот датум ше будзе означовац каждого року.
З нагоди першого означованя Дня Руснацох, у сали “Лавослава Ружички" будзе отримана шветочна академия, а програма будзе составена з найлєпших точкох з хторима нєшка розполагаю члени руских културно-уметнїцких дружтвох у Горватскей.

За музичну часц академиї задлужени Юлиян Бучко, за литературну професорка руского язика Мария Хома, конферансу написала поетеса Агнета Бучко з Нового Саду, родом з Миклошевцоха, а буду ю водзиц Илона Гнатко и Йосип Маєр.

Попри Руснацох з Вуковару и околних местох, прейґ обезпечованя автобусох до местох дзе у Горватскей жию Руснаци, орґанизатор оможлїви же би програму провадзело цо векше число Руснацох у Горватскей.

На академию поволани и числени госци - представителє општинских, городских, жупанийских и републичних орґанох, а очекує ше и приход Руснацох з Войводини.
 

(конєц) дюлї