Nacionalne šveto Rusnacoch

 

НАЦИОНАЛНЕ ШВЕТО РУСНАЦОХ
Вецейзмистова програма

Вчера у Руским културним центре у Новим Садзе означене Националне швето Руснацох, хторе почало з минуту цихосци за упокоєного Андреиа Даждиу, длугорочного активного члена РКЦ и члена нашого Националного оркестру.

Хор "Гармония" одшпивал державну гимну "Боже правде" и нашу Шветочну шпиванку "Браца Русини", а предсидатель Националного совиту Руснацох Славко Рац  у своєй привитней бешеди, медзи иншим визначел же нашо предки могли лєм пожадац таки ступень културней автономиї яки ми нєшка ту маме, а хтори маме з одвичательносцу зачувац и пренєсц идуцим ґенерацийом, та присутним повинчовал Националне швето.

После привиту госцох од директора РКЦ Владимира Сивча, крем Хору "Гармония", под дириґенством Сузани Ґрос Маркович, з провадзеньом на гармоники Давора Сабоа, у програми участвовали  Хлопска и Женска шпивацка ґрупа РКЦ, Оркестер РКЦ, а Мария Римар одрецитовала писню "Кед голубица лєцела" Михала Ковача.

У рамикох преслави Националного швета у Новим Садзе у РКЦ була и вистава еко-виробкох з природних материялох Миряни Антич, а з тей нагоди отворени и реновирани простор Клубу РКЦ. После урядовей програми присутни ше дружели на коктелу, дзе гралу Звонимир Кочиш, Мирослав Пап, Владимир Сивч и Саня Полдруги.

На програми з нагоди Швета Руснацох присуствовали Владимир Кнежевич з Городскей управи Нового Саду, задлужени за културу, члени НС Руснацох Йовґен Мудри, Дюра Винаї, Наташа Макаї Мудрох, Мелания Римар, директор Заводу за културу войводянских Руснацох Мирослав Кевежди, подпредсидатель Союзу Руснацох Українцох Сербиї Велимир Паплацко и подпредсидатель Рускей матки Миломир Шайтош, як и представителє руских институцийох и орґанизацийох.

(конєц) опс