Nacionalni sovit Rusnacoch konstituovani, Slavko Rac znova predsidateľ

 

Национални совит Руснацох конституовани, Славко Рац знова предсидатель

 

З потвердзованьом мандатох членом, у Руским Керестуре вчера конституовани Национални совит (НС) рускей националней меншини у Сербиї, вибрани на директних виберанкох 26. октобра и творя го 19 члени хтори були на седем виберанкових лїстинох. Шицки 19 члени присуствовали на вчерайшей схадзки и од Министерства за державну управу и локалну самоуправу, хторе и зволало схадзку, достали Уверенє о виборе до Совиту.

 

З конститутутивну схадзку предшедовало Роботне предсидательство, хторе творели найстарши и двойо наймладши члени нового зволаня Совиту - Йовґен Мудри, як предшедуюци и Наташа Регак и Саша Сабадош.

 

После конститутованя, нови члени подписали Записнїк з конститутивней схадзки, а з явним гласаньом и векшину од 10 гласох "за", вчера вигласане же би ше такой отримало и першу порядну схадзку нового зволаня з главну точку дньового шору - вибор предсидателя НС Руснацох, а прилапени є з 13 гласами "за".

 

Гоч така можлївосц дата у допису зоз спомнутого Министерства, тота одлука виволала процивенє дзепоєдних членох Совиту и у дискусиї виношели же нє треба понагляц з вибором предсидателя, понеже то мож окончиц 30 днї после конституованя. Пригваряне же перша схадзка нє порихтана и же є нє у складзе з новим Законом о националних совитох, та би ше, як поведзене, перше мушело зоз Законом ускладзиц Статут и Дїловнїк о роботи Совиту и аж вец виберац предсидателя и други цела.

 

Предшедуюци и други члени котри потримали отримованє першей схадзки зауважовали дискутантом же ше нароком окончує обструкцию вибору предсидателя, толковали же спрам законских предписаньох Статут мож ускладзиц 20 днї од дня конституованя, роботни цела Совиту ше муши вибрац о 40 днї и, як гварене, праве з вибором предсидателя тоти роботи надалєй буду покончени.

 

После длугшей дискусиї прешло ше на процедуру вибору предсидателя НС, хтора подрозумйовала же кандидати за тото муша мац найменєй седем подписи потримовки и придали их Славко Рац и Олена Папуґа, котри усмено винєсли и свойо програми роботи, а найвецей дискутоване о програми роботи хтору дал Рац.

 

Одлучене же би гласанє о виборе предсидателя НС Руснацох було явне и ношитель лїстини "Вєдно за Руснацох" Славко Рац достал 11 гласи, а ношителька лїстина "Руска лиґа" Олена Папуґа достала 7 гласи. Єден глас бул "стримани".

 

Попри пецерих членох НС з лїстини "Вєдно за Руснацох", за дотерашнього предсидателя Совиту гласали и тройо члени з лїстини "За Руски Керестур", та по єден член Совиту з лїстинох "Я Руснак", Руска инициятива и "Руска младеж".

 

За Олену Папуґа гласали штверо члени Совиту з лїстини "Руска лиґа", двойо члени з лїстини "Я Руснак" и єден член з лїстини "Млади за будучносц". "Стримани" глас бул глас члена з лїстини Руска инициятива.

 

Як у дискусиї на схадзки наявел нови-стари предсидатель Славко Рац, найвироятнєйше же шлїдуюца схадзка Националного совиту будзе 6. децембра, понеже дзень познєйше виходзи законски термин за ускладзованє Статута з новим законом.

 

автор:  зам