Nacionalni sovit - upisovanje do viberankoveho spisku

Квота за Руснацох 6 741 уписани
Же би ше витворело условиє за отримованє директних виберанкох за членох нового зволаня за Национални совит Руснацох, до окремного виберанкового списку потребне же би ше уписал 6 741 Руснак з правом гласа у Сербиї - заключене на остатнєй схадзки нашого Националного совиту, хтора всоботу, 5. децембра отримана у Кули.

Упис до окремного виберанкового списку припаднїкох нашей националней меншини була єдна з главних темох порядней, 36. схадзки Националного совиту, хтора всоботу отримана у просторийох кулского руского КУД "Др Гавриїл Костельник".

Попри одредзованя вкупного числа Руснацох з правом гласа потребного за нєпоштредни виберанки будуцого Националного совиту, на истей схадзки одредзене и число потребних уписаних по општинох дзе у векшим чишлє жию Руснаци.

Числа, односно потребни квоти, виробени на основи податкох з остатнього попису жительства - зменшано за 20 одсто, плус єден виберач, а на основи нового Закона о националних совитох.

У конєчней збирней квоти за цалу нашу заєднїцу у општини Кула потребне же би ше до окремного виберанкового списку уписали 2 378 Руснаци, а у општини Вербас 1 658 Руснаци, и у тих двох општинох то и найвекше число.

У Новим Садзе потребна квота уписаних до окремного виберанкового списку виноши 896, а у жабельскей општини то 621 уписани.

У општини Шид тота квота виноши 582 уписаних, а у општини Сримска Митровица 306 уписаних Руснацох до окремного виберанкового списку.

За општину Бачка Тополя тото число виноши 130 уписаних, у Суботици то 73, док у Беоґрадзе, за цо тиж постоя статистични податки з остатнього попису жительства, до окремного виберанкового списку потребне же би ше уписали 97 Руснаци.

Члени Националного совиту достали задлуженє же би дознали найприблїжнєйше число припаднїкох нашей заєднїци, як по местох у спомнутих општинох, так и у других дзе ше зна же єст Руснацох, як цо то нпр. Темерин, Сримски Карловци, Зомбор, Оджак, Титель и други општини.

(конєц) зам