Nacionalnosc Rusnaci, macerinski jazik ruski (rusinski)

 
Националносц Руснаци, мацерински язик руски (русински)

РУСКА МАТКА - ПОПИС ЖИТЕЛЬСТВА

Руска матка поволує шицких Руснацох же би участвовали на попису жительства у Републики Сербиї, хтори будзе отримани од 1. по 15. октобер 2011. року.

Пописованє жительства представя найважнєйше статистичне жридло податкох о жительству и обисцох у нашей держави, а одвити на питаня даваю нам можлївосц дознац кельо нас єст и дзе и як жиєме. 

За нас Руснацох найважнєйши питаня под числами 21. и 22. хтори директно вязани за националносц и мацерински язик. На тоти питаня Руснаци би обовязно требали дац одвит же су по националносци РУСНАЦИ (РУСИНИ) и же їх мацерински язик РУСКИ (РУСИНСКИ).

Гоч по члену 47. Уставу Републики Сербиї граждан нє длужни вияшнїц ше о националней припадносци и мацеринским язику, за нас Руснацох тоти питаня под числами 21. и 22. барз значни.
Значни су прето же лєм на тот способ, кед ше вияшнїме же зме Руснаци и же нам мацерински язик руски, маме шансу зачувац свой национални идентитет, здобути права, свою школу, свой язик.

Цо нас ше вецей вияшнї, маме векшу можлївосц од держави вимагац защиту своїх здобутих правох хтори ше, нє ридко, у дзепоєдних сеґментох живота потупює. Тоти потупйованя часто нє нароком, алє пре прости факт же векшина часто забува и нє може похопиц меншинску чувствительносц и меншински потреби.

Прето, Руска матка поволує Руснацох же би ше на наступним попису так и вияшнєли, бо попис то призначка за будучносц.

Руска матка