Naša spiľna pamjať: 75. ričnyc’a vŷhnaňa

Všŷtkŷch nas lučŷt pamjat. Bo bez pamjaty ne mož projektuvaty budučnosty.

V 2022 r. spomyname na smutnu, 75. ričnyc’u Akcyi «Visla» – operacyi, jaka dovela do ostatočnoho znyščŷňa Lemkovynŷ, kjed že korinnŷj jej narid bŷl vŷselenŷj na zachidni i pilničnŷ zemli povojennoj Poľskoj Respublykŷ.

Akcyja «Visla» začala s’a rano 28. kvitňa/apriľa 1947 r. V tot den bŷlo vŷseľuvane jedno z našŷch sel na schidnij Lemkovyni – Ščavne. Choťačŷ upamjatnyty totŷ smutnŷ podii, v subotu – 30. kvitňa/apriľa 2022 r., zŷjdeme s’a v misc’ach, jakŷ ne lem symvolyčno – ale i faktyčno – zasvidčujut pro tragedyju našŷch didiv, rodyčiv i daľšŷch pokoliň Lemkiv.

Spiľnota pamjaty
Do spiľnotovŷch upamjatniň 75. ričnyci Akcyi «Visla» klyčut vjedno Stovaryšŷňa Lemkiv i Stovaryšŷňa «Ruska Bursa» v Gorlyc’ach.

Peršŷm punktom v programi bude oddaňa česty žertvam lagru pracŷ v Javožni pry lemkivskŷm miscy pamjaty. Kviťa pry pamjatnyku, što bŷl odkrŷtŷj pered pjaťoma rokamy, položŷt delegacyja Stovaryšŷňa Lemkiv, jaka symvolyčno bude išla z čužŷnŷ na Lemkovynu. Podii v Javožni zapľanuvano na 11.00 hod.

Misc’om, de tŷm razom prozvučŷt velykodňa molytva za všŷtkŷ žertvŷ vŷhnaňa, bude nevelyka bŷvša hrekokatolycka cerkov sv. Mychala v neistnujučŷm po vŷseliňach seli Bilyčna (bl. Іzb, gmina Usťa Ruskje). Pamjatkovŷj chram to jedynŷj objekt, jakij lyšŷl s’a hŷn po provedenij prymusovij deportacyi žŷteliv. Okrem toho – jak i v inčŷch porožnich selach – strityty hodnŷ sme hŷn lem ovočovŷ dereva, kaminnŷ krestŷ, kaplyčkŷ i cmontir. Tota čast programu zapľanuvana je na 14.00 hod.

Pak zobranŷ pereichajut do Usťa Ruskoho, de pid slavnŷm pamjatnykom v centri sela zložene bude kviťa v pamjat našŷch predkiv. Choc usťaňskij pamjatnyk pervistno bŷl voznesenŷj v čest borciv z Lemkovynŷ za svobodu včas ІІ svitovoj vojnŷ i tzv. dobrovoľciv, z pryčŷnŷ dekomunizacyjnoho procesu  – aktuaľnŷj zmist tablyci holosyt pro pamjat na všŷtkŷch žŷteliv Lemkovynŷ, što doznaly terroru z boku nimeckoho, sovitskoho i komunistyčnoho režimiv.

Poslidnim punktom upamjatniň bude striča, jaka začne s’a o 17.00 hod. v prostorach gorlyckoj Ruskoj Bursŷ. V tij časty bude misce na spomynŷ vŷselenciv, jak tiž dopovidy i vŷstupliňa zaprošenŷch hostiv.

To ne konec
Okrem rečenŷch centraľnŷch upamjatniň, ričnyc’ovŷ akcentŷ javľat s’a i na daľšŷch lemkivskŷch podijach, jakŷ budut organizuvanŷ našŷma obščestvamy.

Pevnisťu spomynovŷ akcyi budut odbŷvaty s’a včas ChІ Medženarodnoho Bijenale Lemkivskoy̆/Rusyňskoy̆ Kuľturŷ v Krenycy (20.-21. maja), a tiž na LXII Lemkivskiy̆ Vatri na Čužŷni – v Mychalovi (5.-6. serpňa/avgusta). Tohorična ChChCh Lemkivska Tvorča Osin (8.-9. žoltňa/oktobra), jaka projde v Biľanci i v Ruskiy̆ Bursi v Gorlyc’ach, okrem spomyniv na Pavla Stefanovskoho (1932-2021), bude svoim programom upamjatňala i vŷseliňa z 1947 r.

Stovaryšŷňa Lemkiv, Stovaryšŷňa «Ruska Bursa» v Gorlyc’ach i pevnisťu inčŷ lemkivskŷ organizacyi budut toho roka spomynaty na 75. ričnyc’u Akcyi «Visla» i na inčŷ sposobŷ.

Prymirom Petro Mur’anka pľanuje vznovyty vŷdaňa knyžkŷ «A Visla dale plŷne», jaka javyla s’a na 60. ričnyc’u deportacyi. Vedučŷj Stovaryšŷňa Lemkiv i režŷser, Andryj Kopča už teper pracuje nad realyzacyjom ІІІ časty fabuľarnoho fiľmu «Akcyja Visla. Povorot».

Severyjan Kosovskij 

žridlo:
https://www.lem.fm/upamyatninya-75-richnitsi-vyhnanya/