Návrh na národné symboly Rusínov v Srbsku

РУСКИ КЕРЕСТУР - НАЦИОНАЛНИ СОВИТ
Принєшена одлука о националних символох Руснацох у Сербиї

РУСКИ КЕРЕСТУР, 16. април 2007 - Влади Републики Сербиї и Републичному совиту за национални меншини пошвидко будзе послати предлог одлуки о националних символох рускей националней заєднїци у Сербиї, односно - о гербу, застави и швету Руснацох у Сербиї.

Одлука о тих националних символох єдногласно принєшена на остатнєй, 18. порядней схадзки Националного совиту Руснацох, котра всоботу, 14. априла отримана у Руским Керестуре.

Як на схадзки гварел предсидатель Националного совиту Славко Орос, по тераз на Влади Републики Сербиї и Републичним совиту за национални меншини нє було нїяки проблеми коло прилапйованя предложених символох других националних заєднїцох, та вироятно и предлог Националного совиту Руснацох будзе прилапени.

На остатнєй схадзки Совиту бешедоване и о шветочней шпиванки Руснацох у Сербиї, цо нє обовязне же би ше ю мало, так же и одлуку о шветочней шпиванки приноши лєм Национални совит, а нє и найвисши Републични орґани.

Национални символи рускей националней заєднїци и Националного совиту Руснацох у Републики Сербиї застава зоз гербом, а символи творя два состойни елементи - герб и заставу.

Як ше гвари у толкованю тих символох - "герб змесцени до класичного штироуглого шчиту французкого типу и подзелєни є на два основни поля котри го з вертикалну осу, од глави ґу бази, дзелї на два поля".

"На його правей половки приказани медведз основней червеней, односно цмей червеней фарби у стояцим положеню котри патри на прави бок. Спрам єдного толкованя, медведз стародавни славянски символ котри Русинох/Руснацох вяже за їх праотечество у Карпатох".

"Друга половка герба подзелєна на седем єднаки горизонтални поля на котрих ше зменюю пантлїки белавей и жовтей (златней) фарби".

"Описани герб ма свою историйну традицию - його зявенє мож спатрац у шветлє културно-националного руху Русинох у дакедишнєй Австро-Угорскей: по законченю Першей шветовей войни, новоформованей Чехословацкей републики були припоєни етнїчни краї у подкарпатскей обласци бувшей Угорскей, котри формовали аутономну обласц "Подкарпатска Рус" зоз шедзиском у Ужгородзе".

"Спомнути символ 30. марца 1920. року постал урядови герб автономней єдинки у составе Чехословацкей (1919-1938). Спрам даєдних толкованьох, на тим символу пантлїки белавей фарби означую штири комитати, односно жупаниї (Унґ, Береґ, Угоча и Мараморош), котри вошли до составу спомнутей обласци, а три златно-жовти пантлїки - три златоносни рики з тей обласци (Уж, Латорица и Тиса)".

"Комбинованє белавей и жовтей фарби вшелїяк присутна и у ознакох вецей жупанийох, односно комитатох подкарпатскей (закарпатскей) обласци, а у историйним змислу, белаво-златна комбинация и ознака Рюриковича, владарского дому Києвскей Руси, першей штредньовиковней держави Восточних Славянох, односно Русинох".

"После Другей шветовей войни, 1945. року, Подкарпатска Рус, под урядовим меном "Закарпатска обласц", уходзи до составу Українскей совєтскей републики тедишнього СССР".

"Од 18. децембра 1990. року тот герб и формални символ Закарпатскей обласци України и таки остал и до нєшкайшого дня у рамикох Українскей нєзависней держави".

"У каждим случаю, без огляду на историйни контексти, односно пременку историйних гранїцох, вон символ обласцох зоз котрих ше доселєло вельке число предкох тутейших Руснацох, та и найвекша часц од 200 фамелийох, котри на тото мали право спрам Контракта хтори подписал совитнїк царици Мариї Терезиї и администратор Кральовско-державного Бачкого дистрикту у Зомборе, 17. януара 1751. року".

"Нєшка тот герб представя общеприлапени знак векшини русинских орґанизацийох ширцом швета (Словацка, Чешка, Польска, Україна, Мадярска, Руминия, Горватска, Сербия, Нємецка, ЗАД, Канада...) Вон препознатлїви знак и часц идентитета шицких Русинох/Руснацох, без огляду на їх националну ориєнтацию и реґионалну припадносц".

"Його историят и применьованє, заправо злучую тоти ориєнтациї и окремносци, односно, допущую найвекшому числу Русинох же би го прилапели як свой, без огляду на їх доживйованє националного идентитета и питаня матичней жеми" - гвари ше у толкованю одлуки-предлога за герб Руснацох у Сербиї, котре будзе послате до Републичних орґанох на прилапйованє.

На основи одлуки Националного совиту, за заставу Руснацох, до Влади Републики Сербиї будзе послате шлїдуюце толкованє: "у случаю Русанцох у Сербиї, герб положени на сербску трофарбнїцу - на заставу Републики Сербиї".

"През тото злученє, витворена єдинствена символика - у нїм виражена ґеоґрафска и психолоґийна припадносц Руснацох держави Сербиї и традицийного заєднїцтва з державотворним народом, а источасно и нєспорна вязаносц за историйни край свойого походзеня".

Спрам одлуки, односно предлогу Националного совиту, котри будзе доручени Влади и Републичному совиту за национални меншини на одлучованє, националне швето Руснацох у Сербиї будзе 17. януар.

Тот дзень представя "здогадованє на 17. януар 1751. року, кед Франц Йозеф де Редл, совитнїк царици Мариї Терезиї и администратор Кральовско-державного Бачкого дистрикту у Зомборе подписал перши урядови документ - Контракт о насельованю 200 руских греко-католїцких фамелийох на тедишню пусту Вельки Керестур".

"Тот дзень уж вецей децениї прилапени як дзень урядового досельованя Руснацох на тоти простори" - гвари ше у толкованю Националного совиту.

Можлїве же Руснаци у Сербиї буду мац ище єден дзень як свойо националне швето (як то случай и при других националних заєднїцох у Сербиї), котре би обєдиньовало духовни и шветовни змисти, о чим до тераз на вецей заводи бешедоване з найвисшима достойнїками Апостолского еґзархата за грекокатолїкох у Сербиї.

У дотерашнїх розгваркох, як предлог за тото швето споминани Треци дзень Русадльох, односно Завитни дзень у Водици и 9. май, як Дзень Еґзархату, цо и родзени дзень рускокерестурскей Соборней церкви (Кирбай у Керестуре), а источасно то и дзень Побиди над фашизмом и Дзень Европскей униї.

Медзитим, зоз Еґзархату ище вше нє достате конєчне опредзелєнє о тим заєднїцким датуме за шицких тутейших Руснацох, и кед же по формованє Влади РС предлог зоз церкви будзе дефиновани, тиж будзе послати на одлучованє до Републичних орґанох.

Национални совит може принєсц и одлуку о шветочней шпиванки (нє гимни), як ознаки националней заєднїци, так же за тото були предложени три шпиванки: "Руски Керестур (Руснак)", Михала Бодянца, " З давен давна" Агнети Тимко и "Браца Русини" Иринея Тимка.

О можлївосцох же би даєдна з нїх була шветочна шпиванка консултовани и фаховци з тей обласци, та и на основи того на Националним совиту дефиноване же би ше за два шпиванки - "З давен давна" и "Браца Русини" виробело окремни аранжмани, а же композиция "Руски Керестур (Руснак)" мелодийно нє одвитує потребом за шветочну шпиванку.

Виробок аранжманох за оркестер найвироятнєйше будзе понукнуте нашим двом фаховцом з обласци музки - Мироньови Сивчови и Юлиянови Рамачови Чамови.

Аранжмани би мали буц виробени по Фестивал култури "Червена ружа", кеди тоти композициї буду и виведзени з нову гармонию, же би аж после того Национални совит принєсол одлуку о шветочней шпиванки.

Кед же анї єдна з нїх нє будзе одвитовац за тоту намену, постої можлївосц розписованя явного конкурса за текст и мелодию шветочней шпиванки Руснацох у Сербиї.

Ґу тому, на схадзки Национланого совиту принєшена и одлука же би ше на наш язик преложело и присподобело общерусинску гимну "Я Русин бул" А. Духновича, односно прилапело даєден з дотерашнїх прекладох тей шпиванки.

Попри тих найзначнєйших одлукох о националних ознакох, Национални совит розподзелєл 300 000 динари, котри на основи конкурсох достати од Министерства култури и медийох.

Так 150 000 опредзелєни за ФК "Червена ружа", 100 000 за Драмски мемориял Петра Ризнича дядї и 50 000 динари за КМ "Костельникова єшень".

На схадзки привитана информация о запланованих активносцох Дружтва Русинох у Сримскей Митровици, после вибору нового руководства Дружтва, з наглашеньом же накадзи на уровню Републики будзе прилапени нови буджет и опредзелєни средства за роботу националних совитох, и тото Дружтво войдзе до буджету Националного совиту.

Як догварене, после нащиви предсидателя нашого Националного совиту Дружтву Русинох у С. Митровици, найвироятнєйше буду опредзелєни 10 000 динари за початок їх роботи.

За роботу Секциї етно-култури при Еколоґийним руху "Желєни персцень" зоз Руского Керестура Национални совит одобрел 10 000 динари, а молба Меланиї Римар за суфинансованє прекладу на сербски язик єй кнїжки приповедкох и сказкох за дзеци "Сказков заглавчок" будзе перше розпатрана на Одборе за културу.

Тиж так, з оглядом же РКПД Нови Сад и новосадска Парохия св. апостолох Петра и Павла формовали заєднїцки мишани хор, после приношеня буджету Националного совиту, и вон будзе доставац финансийну помоц, як и други подобни хори по наших местох.

(конєц) зам

www.ruthenpress.info