Návšteva z OEBS v Ruskom Keresture

Нащива делеґациї ОЕБС-а
Упознаванє зоз цеком и активносцами на уписованю Руснацох до Окремного виберанкового списку, була главна тема розгваркох представительох Делеґациї ОЕБС-а у Сербиї зоз чолнима особами Националного совиту Руснацох.

Представителє ОЕБС-а, на чолє зоз шефицу Оддзелєня за демократизованє Диану Фалони, Национални совит Руснацох у Руским Керестуре нащивели вчера, 4. фебруара, дзе им домашнї були предсидатель и подпредсидательки нашого Националного совиту Славко Орос, Ирина Олеяр и Татяна Бучко Рац, як и секеретар НС Йоаким Рац.

Попри Диани Фалони, з представителями нашого Националного совиту бешедовали и Александра Ваґнер, политична совитнїца Диани Фалони, як и Мая Мичич, висши сотруднїк за явну управу ОБС-ового Оддзелєня за демократизацию.

Як за Рутенпрес после вчерайших розгваркох гварела Диана Фалони, главне було упознац ше з процесом уписованя Руснацох до ОВС, алє и дац потримовку Руснацом и Националному совиту при толкованю значносци того уписованя, односно здобуваня можлївосци за директни вибор будуцого Националного совиту Руснацох.

- ОЕБС окреме потримує тото уписованє, як и директни вибор националних совитох националних меншинох у Сербиї, и у тим поглядзе цесно сотрудзує з Републичним Министерством за людски и меншински права, так же финансийно потримал и публикованє плакатох, афишох и другого пропаґандного материялу за тоту акцию Министерства - гварела Фалонийова.

Як гварене, по вчера, 4. фебруар, вимоги-формулари за уписованє до ОВС виполнєли 3 997 Руснаци, а потребна квота за можлївосц директного вибераня Националного совиту виноши 6 363 и тих дньох у скоро шицких местох дзе жию Руснаци почина интензивна кампаня на уписованю - по системи “од хижи до хижи”.

Як за Рутенпрес гварела Фалонийова, спрам їх спознаня, при националних меншинох у Войводини ситуация коло уписованя до ОВС вельо лєпша як у других часцох Сербиї.

Пред нащиву Националному совиту Руснацох, иста делеґация ОЕБС-а уж нащивела национални совити Словацох и Нємцох, наступних дньох делеґация ОЕБС-а нащиви совити Мадярох, Бунєвцох, Горватох и Румунох, а їх колеґове подобну нащиву окончую и у других часцох Сербиї, односно нащиви албанскей, бошняцкей и другим меншином у Сербиї.

(конєц) зам