Ňeška označovaňe 10-ročnici Egzarchatu

Нєшка означованє 10-рочнїци Еґзархату
Нєшка у Водици будзе перша часц означованя 10-рочнїци преглашеня Апостолского еґзархату за грекокатолїкох у Сербиї и Чарней Гори (нєшка лєм у Сербиї). Ювилей ше означує на треци - Завитни дзень Русадльох у Руским Керестуре.
 
Благодарна Архиєрейска служба Божа у Водици почнє на 10 годзин, а будзе ю предводзиц апостолски нунций у Републики Сербиї, монс. Орландо Антонини, вєдно з нашим владиком Георгийом и грекокатолїцкима владиками з других жемох, як и владиками римокатолїцкого обряду з нашей и жемох у окруженю.
 
Як дознава Рутенпрес, приход на нєшкайшу шветочносц у Водици потвердзели грекокатолїцки владикове Филип Кочиш и Атанас Орос з Мадярскей, митрополит Ян Бабяк з Прешова, зоз Словацкей, та Милан Шашик и його помоцни владика Нил Лущак з Ужгороду, з України. Приход потвердзели и архиепископ беоґрадски, монс. Станислав Гочевар и други римокатолїцки владикове зоз Сербиї.
 
Тиж так, на шветочносци буду присуствовац и представителє Канцелариї Влади Републики Сербиї за одношеня з церквами и вирскима заєднїцами, як и представителє локалней самоуправи.
 
На рочнїцу снованя Еґзархату поволани и числени священїки, вирни зоз шицких наших парохийох и други госци. Як плановане, друга часц означованя 10-рочнїци будзе з науковим симпозиюмом на єшень.

автор:  маф