Ňeška prilapjovaňe Nacionalnej strategiji

Нєшка прилапйованє Националней стратеґиї

На нєшкайшей Шветочней схадзки Националного совиту (НС) Руснацох мала би буц прилапена Национална стратеґия Руснацох у Сербиї по 2020. рок. Шветочна схадзка будзе отримана з нагоди означованя 10 рокох постояня Националного совиту, так же як госци, на схадзку поволани члени шицких одборох НС, представителє институцийох и установох у обласци образованя, информованя и култури, предсидателє предходних двох зволаньох националного совиту, представителє державних орґанох и локалней самоуправи и представителє Апостолского Еґзархату за грекокатолїкох у Сербиї и Чарней гори. Нєшкайша Шветочна схадзка НС Руснацох будзе отримана у Ресторанє „Червена ружа" у Руским Керестуре од 17 годзин.
 
Попри НС, конкретни ношитель виробку Нарису Националней стратеґиї Руснацох бул Одбор за науку НС, а тексти за Стратеґию, за обласци над хторима НС ма компетенциї, написали академик Юлиян Тамаш, др Михайло Фейса, др Яков Кишюгас, др Янко Рамач, др Борис Варґа, Михайло Катона, Мирослав Кевежди и Боґдан Виславски. Редакцию тексту хтори дати на явну розправу, потим и редакцию тексту Нарису после датих предлогох и заувагох на розправи, виробели академик Юлиян Тамаш и Михайло Катона, же би финалну верзию Нарису Националней стратеґиї Одбор за науку НС прилапел на своєй схадзки 13. децембра.
 
Конєчни текст прилапел векшину датих конструктивних заувагох, так же, як пише у Преамбули, Национална стратеґия Руснацох документ хтори пописує терашнї стан, понука оптимум вредносних ориєнтацийох рускей националней заєднїци и предклада крочаї и поступки як то витвориц у подручу инґеренцийох хтори держава пренєсла на национални совити, а то право на хаснованє язика и писма у самовиражованю идентитету и пред дружтвом, образованє, информованє и култура.
 
Документ написани на 24-ох бокох и облапя 6 обласци - „Историйни прегляд", та констатованє терашнього стану у праву на хаснованє язика и писма, дзе и окремна обласц о язику, потим у образованю, информованю и култури. Штварта обласц „Стратеґийни цилї", пията „Опредзелєня", а остатня „Акцийни план". Як состойна часц Стратеґиї и штири окремни прилоги - „Явни интерес у култури войводянских Руснацох", „Стратеґия младих у явним живоце Руснацох", обидвом автор Мирослав Кевежди; „Материял за виробок Стратеґиї информованя на руским язику", автора др Бориса Варґу и „Стратеґия розвою рускей литератури", автора академика Юлияна Тамаша.
 
Вилекторовани, односно язично и стилски усоглашени текст Нарису Националней стратеґиї Руснацох у Сербиї по 2020. рок мож опатриц на веб сайту Националного совиту - www.rusini.rs и на Рутенпресу. После його прилапйованя, конєчни текст Националней стратеґиї, познєйше и прилоги ґу нєй, тиж буду обявени на спомнутих сайтох.

автор:  зам