Nove narjadžiňa vlady pomože navčaňu rusyňskoho jazyka

Нове наряджіня влады поможе навчаню русиньского языка 

Влада Словацькой републікы на своїм днешнім засіданю схвалила нову подобу наряджіня влады із ділні Міністерства школства, наукы, досліджіня і шпорту, котрым ся мінить мздовый норматів і норматів на ход основных школ, в котрых діти учать ся язык народностной меншыны, або ся учать в языку народностной меншыны. Зміна норматівів ся позітівно дотулить понад 30 тісяч школярів.

Наряджіня влады Словацькой републікы ч. 630/2008 З.з., котрым ся вастновлюють детайлы розпису фінанчных средств із державного розрахунку про школы і школьскы заряджіня в практіці окрім іншого приносить піднятя моздового норматіву і норматіву на выховно-освітній процес на школяря основной школы, котрый буде по новому про школы з іншым навчалным языком як словацькым представльовати 113 процент.

Єдночасно запроваджать сю новый норматів на школяря, котрый учіть ся язык народностной меншыны подля рамкового навчалного плану про основны школы з навчаньом языка народностной меншыны (значіть школярь, котрый ся го учіть як повинный предмет), котрый буде представльовати 104 процент і буде односити ся на школы з навчаньом русиньского, ромского, україньского, росісйкого, німецького і хорватьского языків.

Выразив ся і Петро Крайняк, державный секретарь Міністерства школства, наукы, досліджіня і шпорту:

„Змінов предметного наряджіня влады повнить далше із передволебных обіцянь партії Most-Híd, зліпшыти сітуацію школ з навчалным языком і навчаньом языка народностной меншыны, ко чумо сьме ся завязали і в проґрамовім документі Гражданьска візія (Občianska vizia). За ключове беру, жебы сітуація на меншыновых школах надалше поступно зліпшовала ся і єм пересвідченый, же ку тому вже днесь давать вклад і обновлене Одділіня выховы і освіты народностных меншын, котре веде пані директорка Маріа Прекоп. За політічну підпору і особну анґажованость при зміні наряджіня влады треба подяковати председови партії Белови Буґарови.“ 

Тото наряджіня, котрого зміну ініціовала партія Most-Híd, здобуде платность 1-го януара 2018-го року.

Жрідло:
http://www.lem.fm/nove-naryadzhinya-vladyi-pomozhe-navchanyu-rusinskogo-yazyika/

Жрідло фотоґрафії: Обчаньске здружіня Колысочка.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА