O praveňu nacionalnej strategiji

 

О правеню националней стратеґиї 
 

З оглядом на потребу и єй значносц, почнє ше з виробяньом националней стратеґиї Руснацох, а перши опредзелєня же би була виробена по териториялним и институцийним принципу и по обласцох над котрима компетентни Национални совит Руснацох - заключене на ширшей схадзки у Новим Садзе, котра пияток, 10. децембра, отримана у Заводзе за културу войводянских Руснацох (ВР).

О инициятиви за приношенє националней стратеґиї Руснацох бешедовали члени Предсидательства нашого Националного совиту (НС), його Вивершного одбору, члени Одбору за науку НС, директор Заводу за културу ВР, директорка НВУ "Руске слово" и редакторе руских редакцийох у РТВ Войводини.
 

Виражуюци задовольство зоз зволованьом схадзки на тоту тему, присутни бешедовали о ношительох и методолоґиї вирабяня стратеґиї, єй мисиї и визиї, о одредзованю приоритетох и акцийного плану за Руснацох у наступних 10 рокох, насампредз у позитивним напряме.
До вирабяня єдного такого документу би мали буц уключени шицки нашо места, з наглашованьом своїх найзначнєйших будуцих проєктох, алє и институциї и установи, та вообще, шицки обласци живота Руснацох на тим просторе.
 

Як гварене, ґу вирабяню стратеґиї ше приступи афирмативно и кажде най ше чувствує поволани дац свойо доприношенє; мали би буц одредзени координаторе, оперативци и фахово ґрупи по териториялним и институцийним принципу, як и по обласцох, з тим же би Национални совит Руснацох, Одсек за русинистику и Завод за културу ВР мали буц главни ношителє тей роботи.
 

Предвидзене же уж на своєй наступней схадзки, хтора планована 18. децембра, Национални совит будзе бешедовац о крочайох на вирабяню нашей националней стратеґиї.
 

(конєц) зам