O tidzenj Švetovi kongres RRL

 

Награда керестурскей Школи, Марияни Лявинец и Владимирови Марушинови 
Главна тема зашеданя Комисиї за културу Шветового конґресу Руснацох/Русинох/Лемкох (РРЛ), хтора прешлого викенду под предшедованьом єй предсидателя Миломира Шайтоша отримана у Медзилабороцох, у Словацкей, була приношенє одлуки о добитнїкови тогорочней Награди „Василь Турок-Гетеш", хтору Шветова рада (ШР) додзелює за позарядове доприношенє на полю цалосней култури РРЛ. Награда установена прешлого року.
 

З вельку векшину гласох, Ради предложене же би тоту престижну награду того року достала Основна и штредня школа з домом школярох „Петро Кузмяк" з Руского Керестура, понеже тота образовна институция, значна нє лєм за Руснацох Сербиї, алє и за Руснацох цалого швета, того року преславює 260 роки контунуованого образованя по руски. Награда ище значнєйша, кед знаме же ше у керестурскей школи школую и дзеци з других державох дзе жию Руснаци, а дзекуюци закладаньом за тото и Рускей матки.
 
Попри керестурскей Школи, Награду „Василь Турок-Гетеш" того року достанє и др Марияна Лявинец з Будапешту.

Рада у Медзилаборцох зашедала под час отримованя 51. Фестивалу култури и спорту, так же праве на єдней з програмох директорови и хореоґрафови ПУЛС з Прешова Владимирови Марушинови, уручена Почесна повеля Шветовей ради РРЛ, тиж з меном Василя Турока-Гетеша, за прешли рок.
 

Комисия за културу Конґресу предложела ШР же би ше основало окремну фондацию и отворело окремни рахунок на хтори би кажда матична руска орґанизация, членїца Конґресу, уплацовала одредзени финансийни средства наменєни за Награду.