Obviscenje Informativnej agenciji Ruthenpress

Обвисценє Информативней аґенциї “Рутенпрес” 
Почитовани читаче и хаснователє Информатвней аґенциї Рутенпрес, информуєме вас же од 18 юлия по 1. септембер 2011. року, дньова Информативна аґенция “Рутенпрес” нє будзе кажди дзень информовац о шицких подїйох з местох дзе жию Руснаци, алє лєм о манифестацийох од значеня за Руснацох, спрам Календара руских манифестацийох, хтори утвердзел Национални совит рускей националней меншини.

Информованє о манифестацийох будзе реализоване з наяву пред отримованьом и з текстами о отриманей манифестациї.

На сайту Рутенпресу буду информациї о Фестивалє “Водова фест” у Руским Керестуре, Фестивалє жридловей творчосци Руснацох “Коцурска жатва” у Коцуре, Фестивалє народних оркестрох “Мелодиї руского двору” у Шидзе, Подобовей колониї “Стретнуце у Боднарова” у Ґосподїнцох и Фестивалє жридлового шпиваня “Най ше нє забудзе” у Дюрдьове.

Попри тим же векшина членох редакциї “Рутенпресу” одходзи на рочни одпочивки, єдна з найвекших причинох тей павзи у роботи и финансийни почежкосци, односно нєдостаток средствох за нормалну роботу “Рутенпресу”.

Роботу тей першей и єдиней информативней аґенциї на руским язику, основаней з цильом пласованя информацийох нащивительом и медийом хтори робя на руским язику на териториї Сербиї и у реґионє юговосточней и штреднєй Европи, вецей як штири роки з найвекшей часци финансовала Новинско-видавательна установа “Руске слово”.

Аґенция урядово почала робиц 15. мая 2006. року з потримовку Министерства за културу и медиї Републики Сербиї. У 2007. року, роботу Аґенциї помогнул Секретарият за информациї АП Войводини, а у 2010. и 2011. року Национални совит рускей националней меншини. Концом 2010. року, Аґенция постала порядна дїлносц НВУ “Руске слово”, алє за ню од финансиєра ище вше нє достати средства.

У 2010. року, робота Аґенциї НВУ “Руске слово” коштала 583 тисячи, а у перших шейсцох мешацох 2011. року 327 тисячи динари. Трошки интернету и символични гонорари сотруднїком у редакциї “Рутенпресу” финансовала НВУ зоз своїх приходох од предаваня других виданьох.

Члени редакциї “Рутенпресу” вецей як штири роки шейсц днї у тижню точно, швидко, прецизно и вичерпно информую о подїйох значних за руску националну заєднїцу у местох дзе жию Руснаци, як и у сушедних  и других жемох у хторих жию Руснаци.

Од снованя Аґенциї, шицки хаснователє безплатно читали, преберали и хасновали информациї. До тераз було вецей як 130 тисячи нащивительох зоз 45 державох швета, рекордна нащива була 7. юния 2010. року, дзень после виберанкох за нови Национални совит, кед “Рутенпрес” нащивели 443 читаче, а у 2010. року було 39 тисячи 173 нащиви.

Штреднє, дньово єст коло 100 нащиви, зоз Сербиї 63 одсто, а з иножемства, найвецей нащиви єст з Канади 15,5 одсто (Саскачеван, Алберта, Онтарио), з Горватскей 6,4 одсто, Словацкей 3,2011. одсто и ЗАД  2011.,9 одсто (Калифорния, Охайо и Вашинґтон).

Од початку емитованя, “Рутенпрес” обявел вецей як 21 тисяч информациї, рочно штреднє коло 4 тисячи, а до тераз зме мали коло тисяч 550 роботни днї.

Павза нє значи и преставанє з роботу Аґанциї “Рутенпрес”, понеже ю предлужиме 1. септембра того року.

Модлїме за порозуменє, а у тим периодзе, читачом препоручуєме же би нащивйовали и сайт http://nove.ruskeslovo.com , на хторим ше находза нови числа новинох “Руске слово”, а з часу на час буду обявйовани и кратши наяви збуваньох.

Директорка НВУ “Руске слово”
Мартица Тамаш
Редактор Рутенпресу
Михайло Зазуляк