Od pijatku "Červena ruža"

Од пиятку „Червена ружа”
Того тижня, на пияток, 29. юния, у Руским Керестуре почина 51. Фестивал рускей култури „Червена ружа”, а будзе тирвац по нєдзелю, 1. юлий. 

„Ружа” на пияток почнє з отвераньом ґрафикох Юлияна Колєсара, а истого дня будзе предлужена з музично-танєчну манифестацию дзецох „Червене пупче”. Попри учасци танєчних ансамблох зоз скоро шицких наших местох, на „Пупчу” буду виведзени и 11 нови композициї за дзеци.

На соботу, 30. юния, на Фестивалє будзе отримани Шветочни концерт, на хторим, попри домашнїх - Мишаного хору Дому култури и Катедалней церкви св. о. Миколая и Музично-танєчного ансамблу керестурского Дому култури, буду виведзени побиднїцки точки з наших фестивалох.

У тей ревиялней часци наступя побиднїки, односно буду виведзени побиднїцки композициї  з тогорочней „Ружовей заградки” - шпивацки дует Николая и Алексей Сивчово з Керестура и Саня Полдруги з Коцура, та Мишана шпивацка ґрупа и Тамбурови оркестер КУД „Тарас Шевченко” з Дюрдьова, як побиднїки на двох прешлорочних фестивалох - „Най ше нє забудзе” у Дюрдьове и „Мелодиї Руского двору” у Шидзе.

Як госци, на соботовим Шветочним концерту наступя Музично-фолклорни ансамбл „Вила” з Нового Саду, зоз танцами и шпиванками зоз Сербиї, та госц з иножемства - Фолклорни ансамбл „Вигорлат” зоз Снїни, зоз Словацкей, хтори виведзе танци и шпиванки з восточней Словацкей.

На нєдзелю, 1. юлия, на сцени у дворе Школи „Петро Кузмяк”, дзе буду отримани шицки програми Фестивала, у змаганю шпивачох-аматерох за найкрасши глас наступя дванацецеро млади шпиваче (єден дует), а после того будзе отримане змаганє 11 нових композицийох у забавним духу.

(конєц) зам