Od pijatku Dramski memorial Petra Riznič Ďaďi

Од пиятку Драмски мемориял Петра Ризнича Дядї
На пияток, 5. априла, почина 45. Драмски мемориял Петра Ризнича Дядї - смотра театралней творчосци Руснацох у Сербиї, и тирва по 13 април, як и до тераз, у Руским Керестуре.
 
Од 5. по 13. април на сцени у Доме култури буду виведзени аж 15 представи - 9 за старших и 6 дзецински, а медзи нїма лєм два госцуюци, так же 13 буду у продукциї нашого Театру и КУД з наших местох. То завидна продукция, праве у року означованя 100-рочнїци од виводзеня першей представи по руски на тих просторох, у чиїм знаку Мемориял будзе и отримани.
 
Руски народни театер „Петро Ризнич Дядя" на Мемориялє наступи з двома театралнима фалатами, як и Дружтво Руснацох у Суботици, хторе того року, попри дзецинскей, витворело и єдну представу за старших. Представи за старших за Мемориял пририхтали и аматере з КУД „Яким Гарди" з Петровцох, з Горватскей, Матка-Дружтво Руснацох Нового Саду и КПД „Карпати" з Вербасу, Драмски студио АРТ керестурского Дому култури, та Руски култури центер з Нового Саду.
 
Попри спомнутих Суботичанох, з дзецинскима представами на Мемориялє наступи и керестурски Драмски студио АРТ, КПД ДОК з Коцура, КПД „Дюра Киш" зоз Шиду, КУД „Тарас Шевченко" з Дюрдьова и Руски културни центер з Нового Саду.
 
И того року Мемориял будзе домашнї єдней представи зоз Смотри драмскей творчосци у кулскей општини, алє и госцом з иножемства - Кладзанскому народному театру з Кладзанох, зоз Словацкей, котри и прешлого року участвовали на Мермориялє. Под час Меморияла будзе поставена вистава малюнкох наивней малярски Зузани Пудлековей з Пиньвиц.

автор:  зам