Odkrytoje pismo - obraščenije do žiteliv Zakarpaťa i misnych urjaduv štodo perepisa ľudnosty u 2013 rokovy

 

Перепис людности в Украйині 2013 року дуже важноє собитіє для русинув Закарпатя. Од його результатув у великуй мірі буде зависити будуща судьба прав і свобод русинського населеня Закарпатської области. Ушиткым патріотам нашого края, вшиткым русинськым організаціям треба прикласти максимум сил діла сотворіня благоприятных условій дотычно одновленя і наверненя пудкарпатськым русинам етнічної самоназвы їх предкув – «русины».
 
Обласна рада вызнала націоналность русин на території Закарпатя і рішила внести її у список націоналностей Закарпатської области (№241 од 7.03.2007)http://zakarpat-rada.gov.ua/rishennya-rady/v-sklykannya/6-sesiya/, а 21 децембра 2012 р. http://zakarpat-rada.gov.ua/rishennya-rady/vi-sklykannya/11-sesiya-ii-zasidannya-21-12-2012/ прийяла законноє рішеня про особый статус русинського языка. Вирховна Рада Украйины вызнала русинськый язык як регіоналный Законом Про основы державної языкової політикы (№5029-VIвід3.07.2012року)http://w1.c1.rada.gov.ua/pls/radan_gs09/ns_arh_golos?g_id=2937906&n_skl=6.
 

Русины благодарні депутатам Верховної Рады та обласної рады, котрі проголосовали за пудтвердженя прийятого Закона в области і рішеня на пуддержку права русинув хосноватися рудним языком. Се є демократичным сигналом русинам і органам місного самоуправліня области до май активных законных чинностей по одновленю нашых прав і свобод. Мы предлагаєме урядови, штобы до переписа населеня позволити провести в усіх населених пунктах зборы, на яких была бы дана можность втолковати людьом, што мож свободно (і без угрозы преслідованя) опредїлитися, і сьым самым свободно вернути собі самоназваня предкув. Прийшов час записатися нам русинами по націоналности, а материнськым языком сміло назвати русинськый.
 

Активісты русинських організацій хотіли бы быти переписовачами, участвовати у разных зборах, у тім числі засіданьох переписовачів, куды їх мавуть приглашати і оповіщати місто, дату, годину начала зборув всьо на законнуй основі. У кожному населеному пункті в публічных містах треба вывісити тексты з вытягами із Закона Украйини Про засады державної языкової політикы (№5029-VI, п. 2, ст. 7), рішень обласної рады про вызнаня національности русин і особый статус русинського языка. Дати возможность активістам русинськых організацій свободно выступати на телевідені, по радіо, надавати правову информацію в новинках діла регулярного высвітленя нынішніх проблем русинув, як свободних граждан державы. Тепирь є законна возможность наново свободно вернути собі давню историчну самоназву русины, тому што Європейська хартія регіональных языкув або языкув меншин прийнята май наперед діла защиты тих языкув, котрим грозить пропаданя. Ни мадярському, ни румунському языкам зничтожіня (зныдіня, пропаданя) не грозить, а русинськый направду нуждаєся у защиті. Булша часть сільських рад можуть принимати рішиня про признаня русинського языка регіональным, а у случайи чийогось сомніваня, законно провести діла такых случаюв звідованя в населеному пункті лем по двох пунктах: націоналность і материнськый язык-бесіда. Русинські організації готові до тісного сотрудництва з місними урядами на вшиткых уровнях з цільов координації пудготовкы до первого демократичного свободного переписованя людности.
 

Кить всі, вадь булша часть етнічних русинув, при переписуванью запишуться русинами, а материнськым языком назвуть русинськый, се докаже логічность рішень обласної рады про признаня націоналности русин і наданя русинському языкови особеного статуса, позволить одродити й розвивати давню культуру, язык, фольклор, обычаї, правдиву исторію карпатськых русинув, а вєдно з сьым обагащати і усильовати державу. Мы всі вєдно, народ і уряд, маєме ухосновати возможность позитивно вырішити русинську проблему дотычно требовань межинародного права, Конституції, законув державы і общелюдськых норм морали при переписуваню 2013 р.
 

Прийшов час пробуженым русинам быти вызнаними! Всім вызнаним русинам чинити на благо Украйины, рудного края і нашого мирного русинського народу! Діла сього треба зробити всьо, што позволять закон, обы при переписованю в 2013 р. коріноє населеня свободно, без тиска націоналістичных елементув, вернуло собі свою историчну самоназву русины діла верховности права в Украйині!
 

Крайовоє общество подкарпатських русинов Микола Бобинець
Народна рада Подкарпатської Русі Микола Староста
Молодьожноє обєднаня русинов Закарпатя Олександр Дуда
Обласний благодійний фонд «Газда» Юрій Головачко