Odluka o datumu Jedenasteho kongresa

Одлука о датуму Єденастого конґреса
Єденасти шветови конґрес Руснацох/Русинох/Лемкох (РРЛ) будзе отримани од 17. по 19. юний 2011. року у Будапешту, одлучене на остатнєй схадзки Шветовей ради (ШР) у Братислави. Одлука о жеми отримованя шлїдуюцого Конґресу РРЛ, же то будзе у Мадярскей, принєшена ище на Дзешатим конґресу у Руским Керестуре, а ШР тераз утведзела и точни термин и место отримованя.

Шесте зашеданє ШР РРЛ отримане 20 новембра у главним городзе Словацкей, у Братислави.  Зашеданю присуствовали шицки 10 члени Ради, а 19. новембра присуствовали и велькому концерту з назву „Рутеника", после котрого Рада мала и кратши розгварки з представителями Влади Словацкей Републики.

Як Рутенпрес дознава од предсидателя ШР Дюру Папуґу, з оглядом же у остатнїм чаше пришло до одредзених нєскладаньох медзи двома орґанизациями на Подкарпатю, у України - Крайовим здруженьом Русинох, на чолє з Миколом Бобинцом з Мукачова, котри и член ШР и Благодарним фондом Тижньово школи Валерия Падяка з Ужгороду, на схадзки у Братислави одлучене же кед до конца того року тоти два орґанизациї нє подпишу спорозуменє о твореню заєднїцкей асоцияциї Русинох Подкарпатя и о медзисобним сотрдунїцтве - буду вируцени зоз членства у Шветовим конґресу (ШК).

Чолнїки спомнутих здруженьох прилапели таке заключенє, та можлїве же наступне зашеданє ШР, на рок, будзе отриманє праве у України, на Подкарпатю, за кеди одложени и розгварки на котри, после вецей урядових вимогох Ради, члени ШР РРЛ поволани до державних орґанох України.

Шветова рада у Братислави констатовала же, крем у Ческей и України, у шицких жемох-членїцох Конґреса отримани Днї Руснацох, та аж и у Сиверней Америки, дзе тот Дзень отримани 26. октобра у Питзбурґу, заєднїцки за Руснацох у ЗАД и Канади.

До конца того рока, Дзень Руснацох, односно Лемкох, будзе отримани ище у Польскей, 5. децембра, а у Ческей и на Подкарпатю идуцого року.

Шветова ради бешедовала и о пририхтованю за наступни пописи жительства, котри идуцого року буду отримани у Словацкей, Сербиї, Мадярскей, Румуниї, Горватскей, Ческей, Америки и Канади, док у України, попис жительства будзе отримани 2012. року.

Виражена потреба за звекшанима пропаґанднима акциями на афирмованю опредзельованя як Русини у жемох дзе жиєме, на чим, попри медийох, буду робиц и русински орґанизациї, а млади прейґ интернету и фейсбуку. На схадзки ШР винєшене и спозоренє на одредзени намаганя же би ше у дзепоєдних жемох, Русини и Українци вияшньовали у єдней рубрики, та кед то будзе и запровадзене, ШР будзе реаґовац при державних орґанох.

Отворена и розправа о пременки Статута ШК РРЛ, а шицки заинтересовани Предлог статута можу достац у матичних орґанизацийох, у Сербиї то у Рускей матки. На зашеданю Ради и на концерту, Дюра Папуґа поволал представительох русинских орґанизацийох и Ради, же би 28. децембра присуствовали означованю 20-рочнїци Рускей матки у Руским Керестуре.

Под час означованя ювилею Рускей матки, истого дня будзе отримане и медзиконґресне зашеданє Комисиї Конґресу за економию и привредни розвой, пре пораду о проєктох за конкурованє до фондох ЕУ и Вишеґрадского фонду.

(конєц) зам