Одышол діяч Федор Ґоч

В віторок 5. червця/юнія вмер Теодор Ґоч, культурно-соспільний діяч і активіста, основатель Музею Лемківской Культуры в Зындрановій.

Вродил ся 28 червця/юнія 1929 рока в Зындрановій. Освіту в рідным селі перервала му война, вчас котрой служыл в войску, наперед в совітскій – в остатніх роках войны, пак в польскым. По войні деякій час жыл на чыжыні, але в 1954 році, як першому Лемкови, повело ся му вернути жыти на Лемковину. Того самого рока Федор Ґоч основал першу повоєнну орґанізацию – Ансамбль Пісні і Танця села Зындранова.

В початках 60. років стал ся активным діячом лемківской секциі при Украіньскым Соспільно-Культурным Товаристві. Был вельолітнім членом і солистом Ансамблю Пісні і Танця «Лемковина», котру поміг основати. Підперал спілпрацу медже лемківском і украіньском еміґрацийом, а жытелями старого краю. В 1968 році довюл до основаня Музею Лемківской Культуры, котрий діє в Зындрановій по днес. Был єдным з основателів украіньского Обєднаня Лемків в 1990 році.

Започаткувал орґанізуваня культурной імпрезы Од Русаль до Яна та печатаня музейного квартальника «Загорода». Реалізувал ся і в писменничій обшыри. Был автором історично-споминовых публикаций (прим. книжкы Лемкы в борбі за свою і не свою недолю, котрой спілавтроом є Адам Барна), статіі, репортажів. Написал пару єдноактовых пєс, сценарий до фільму Лемківскє весіля, автобіоґрафічну книжку Жытя Лемка та інчы.

Похоронны богослужыня зачнут ся в четвер 7. черцвя/юнія о 11.00 год. в православній церкви св. Миколя в Зындрановій, котрой Федор Ґоч был долголітнім старостом. Мал 88 років.

НАТАЛІЯ МАЛЕЦКА-НОВАК

Zdroj:
http://www.lem.fm/odyishol-diyach-fedor-goch/