Olena Papugova jedina Ruskiňa u novim zvolaňu Skupštini

Олена Папуґова єдина Рускиня у новим зволаню Скупштини
Посланїца Лиґи социялдемократох Войводини (ЛСВ) у Народней скупштини Републики Сербиї Олена Папуґова будзе єдина представителька рускей националней заєднїци у новим зволаню републичного законодавного дому.

Папуґовей то будзе други мандат у Скупштини, а вибрана є на пропорцийних парламентарних виберанкох 6. мая, як кандидатка  ЛСВ на лїстини Демократскей странки “Вибор за лєпши живот - Борис Тадич”, з хтору Лиґа формовала предвиберанкову коалицию на републичним уровню.

На основи виберанкових резултатох спомнутей лїстини, ЛСВ достала пейц посланїцких мандати, а понеже ше обчекує же пре формованє републичней власци одредзене число високопозиционованих посланїкох з Демократскей странки да задзекованє на скупштински мандати, спрам коалицийного спорозуменя, ЛСВ вироятно достанє  ище двох посланїкох.

Як гварела Олена Папуґова, посланїки ЛСВ анї у тим мандату нє буду участвовац у вивершней власци, алє им приоритет остава робота у законодавним целу. У Републичним парламенту ЛСВ оформи самостойни Посланїцки клуб.

- Зоз самостойним наступом у скупштинских дискусийох годни зме на ефикаснєйши способ заступац становиска Лиґи хтори ше одноша на ришованє проблемох гражданох Войводини, а явносц, окреме гласаче хтори нас потримали на виберанкох, годни провадзиц же у якей мири сполнюєме предвиберанково обецунки - гварела Папуґова. 

Як гварела, Лиґа и у новим зволаню Републичней скупштини будзе потримовац законских предкладаня хтори доприноша предлуженю европскей драги Сербиї и злєпшаню животного стандарду гражданох, а окреме будзе инсистовац на превипитованю подозривих процесох приватизациї, вименки дзепоєдних нєфункционалних законох и на вигласованю законских актох хтори допринєшу злєпшаню положеня Войводини и єй гражданох.

- Ту окреме думам на приношенє Закона о финансованю Войводини, формованє покраїнского заводу за статистику, же би гражданє Войводини конєчно знали же кельо зарабяю и з яким пенєжом розполагаю и злєпшанє законодавства з обласци польопривреди и аґрарней политики, а будземе инсистовац и на формованю полицийней управи за Войводину - толкує Папуґова.

Як гварела за Рутенпрес, як першу скупштинску инициятиву посланїки Лиґи уж за єшень рихтаю предкладаня з обласци образованя, з хторима би було реґуловане ученє мацеринского язика у войводянских школох, як и за запровадзованє настави язика дружтвеного штредку, же би шицки дзеци могли научиц бешеду своїх сушедох.

(конєц) саб