Oni proslavily rusynskyj narod. Braty Uhriny - sjaťi Kijevskoj Rusi

Они прославилы русинськый народ. Браты Угрины - сяті Кийивської Руси

Александер Духнович у свуй час вповів мудрі слова: «Люби род твой не про то , что он славный но для того, что он твой». Ся сентенція могла бы стати кредом всіх русинув, штобы были твердыми патриотами. Хоть, иппен, слава Господу, наш народ и має ким ся гордити.

З давних давен наші карпатські русины у гляданях серинчі розбредалися по світу. Розумні от природи, образовані, робутні , они наскоро находили собі службу, ставучи майфайними спеціалістами у тому промислови, котрым занималися. И так было издавна: русинув виділи монахами и дружиниками у князюв Кийивськуй Руси, они были товкмачами у петровську епоху и ученими у 19 вік у Росийи, прославилися як воякы, політикы, маляры, акторы у Сівернуй Америци 20 сторуча.

Єдними з такых вызнамних русинув стали выходці з Карпатської (Угорськоі) Руси Моисей, Єфрем и Георгій Угрины (прозивку дустали от назви регіона). Браты были покликані князьом Владимиром діла хрещення русичу, так як русины карпатські хрестилися май скорше на сто рокув ги кой Кийив, и мали духовнику, валовшных вести місіонерську роботу межи його челядьов. То што именно Владимир покликав братув Угриних у Кийив, аргументує образчик, на якум зображеный єдент з братув Мойсей уєдно з князьом Владимиром.
 
Георгій Угрин быв дружинником ростовського князя Бориса, сына Владимира. У «Повісті временних літ» Нестор-ліпописець пише, ож єден из слух Бориса на имня Георгій быв Угрин, и князь так го любив, што «возложив був на нього гривну велику золоту». 24 юлія 1015 року на ріці Альті душогубы, одослані князьом Святополком Окаянним забити брата Бориса, вєдно з ним умертвили и Георгія, бо тот закрыв свого князя тілом. Нестор-ліпописець пише: «І слугу його( Георгія), що(князя прикрив), упавши на нього, пронизали(разом) із ним. Був же цей улюбленцем Бориса». Споминаться Георгій і у «Лаврентієвському літописі», изданому у 1871 рокови.

Эфрем Угрин, коли вчув, што брата забили, прийшов на місто трагедії и найшов одрубану голову Георгія (бизувно, душогубци не могли зняти золоту гривню и тому отсікли голову). Потому вун уєдинився на березі ріки Тверкы (коло нынішнього вароша Торжка). Туй у 1038 рокови сам справив монастирь на честь убієнних Бориса и Гліба. Дустав прозивку Єфрем Новоторжськый. Прожыв до глыбокої старости и умер 29 януара 1053 року. Його мощі были найдені нетлінными у 1573 рокови и до тепирь почивавуть у засновануй ним обителі.

Айбо майзнамый з-помежи братув быв Мойсей, жытіє якого описано у Кийивському Патерику 14 віка. Споминаться вун и у пролозі Мукачовського Літописа. Як и його брат Георгій, Мойсей служив у князя Бориса (992-1016). А по смерти князя Моисей утік и скрывався в Кийиві у Предславы, сестры князя Ярослава. В 1018 рокови, коли польский король Болеслав Храбрый захватил Кийив, сятий Мойсей вєдно з другими попал у Польшу в плєн.
Высокий и ставный легінь, сятий Мойсей полюбився єднуй богатуй полячці-вдові, котруй закортіло го на собі женити. Сятий Мойсей твердо отказався змінити плєн на рабство у жоны. Айбо, не позеравучи на отказуваня, полька купила Мойсея.

Она пыталась по-всякому совратити легіня, но вун предпочьов голодні муки пышним гостинам. Товды полька стала возить сятого Мойсея по свойим землям, думавучи, што вун прельститься властьов и богатством. Сятий Мойсей вповів юй ,што не промінять духовноє багатство на матеріальні блага и стане монахом. Пройижджавучи через ті міста афонський иєромонах постриг го в иночество. Полька приказала растягнути сятого Мойсея на земли и бити го палицями доты, доки земля напиталася кровлю. Она добилась дозвола у Болеслава Храброго робити з плєнним всьо, што хоче. Тко знає, може бы вдова и замордувала Мойсея, айбо пуд час бунта у Польши її забили саму.

Коли Мойсей поправився от ран, то перебрався у Печерський монастирь у Кийиві, пробывши у польському плєні 5 рокув. До кунця свойих днюв вун не муг ходити без палиці от нанесеных з ран. Прожыв преподобный Мойсей Угрин у Печерському монастирі десь коло 10 рокув и умер 1043 рока, де й быв похороненый у Ближньих пещерах. Його мощі є цілющыми (торканя до них злічує от болячок). Молячися од сятому Мойсейови, монахы позбавлявуться плотськых желаній.

Из 1996 року часть нетлінных мощув Мойсея Угрина (єдна рука) находиться у греко-католицькому храмі Мукачовського монастиря Сятого Миколая.

Юрій Шипович

Zdroj: http://ua-reporter.com