Orachovo (Srbija) i Rešov (Slovacka) pobratimeni, formalnosci u avgustu

 

Друженє и на концу нащиви 

Документ о братименю Нового Орахова и Решова зоз Словацкей у бардейовским округу, будзе подписани у авґусту, на дводньовей манифестациї у Орахове - Дзень валалу. Тото догварене внєдзелю, 24. фебруара дополадня, на стретнуцу делеґациї Русинох зоз Словацкей з предсидательом Месней заєднїци (МЗ) Нове Орахово Золтаном Фаркашом и секретарку МЗ Марию Шпер. По урядове подписованє, мож тримац же два спомнути валали побратимени и сотрудзую, а по авґуст акт о братименю будзе пририхтани у обидвох местох.
 

Як познате, новоораховске Културно-уметнїцке дружтво „Петро Кузмяк" од пиятку, 22. фебруара, та по нєдзелю 24. фебруар, було домашнє госцом зоз Словацкей - з Бардейова, Свиднїку, Старей Любовнї и з Решова. Инициятиву о братименю Решова и Нового Орахова порушал началнїк бардейовского округу Мирослав Буйди, цо бул и циль тей нащиви.
 
Попри спомнутого Буйду, у делеґациї були началнїк старолюбовлянского округу Петро Сокол, началнїк свиднїцкого округу др Йофеф Баслар, як и старостка валалу Решов Гелена Ямроскович Казимирова и члени управи места Решов.
 

За госцох ораховске Дружтво пририхтало рижнородну програму, та пияток у просторийох Руского дому отримане заєднїцке друженє, соботу нащивели нашо институциї у Руским Керестуре и Коцуре, а исти дзень вечар були госци на Ловарским балє у Орахове. Внєдзелю и пондзелок були у нащиви Руснацом у наших сримских местох, же би их до Словацкей вчера вечар випровадзели Ораховчанє, як домашнї їх пребуваня у Сербиї.

 

автор:  себ