Osnovana ARUN

Вчера у Медзилаборцох, у Словацкей, основана Асоцияция русинских новинарох (АРУН)  швета.

За предсидательку АРУН вибрана Єлена Перкович зоз Сербиї, за подпредсидательку Марияна Лявинец, мл. з Мадярскей, а за секретарку АРУН Силвия Лисинова, зоз Словацкей.

Сновательне зашеданє АРУН отримане на зашеданю Комисиї за информованє Шветового конґресу РРЛ, под предшедованьом Владимира Дудаша з Руского Керестура, а присуствовали на нєй професийни новинаре з нашей жеми, домашнї зоз Словацкей, та з Мадрскей и Горватскей.
Попри новинарох, Декларацию о снованю АРУН подписали и предсидатель Шветовей ради РРЛ (ШР) Дюра Папуґа з Руского Керестура, члени ШР Марияна Лявинец ст. з Мадярскей, Андрей Копча з Польскей и Владимир Противняк зоз Словацкей, предсидатель Конґресней комисиї за информованє Владимир Дудаш, як и Валерий Падяк з Подкарпатя, з України.
Попри спомнутих, з нашей жеми, поєдинєчно, а нє у мено редакцийох, сновательну Декларацию подписали Михайло Зазуляк, Славко Винаї и Мирослав Силадї, а з Горватскей Агнета Костелник Блатинац.

Зоз снованьом тей Асоцияциї витворени єден спомедзи задаткох з остатнього, Дзешатого шветового конґреса РРЛ, котри прешлого року отримани у Руским Керестуре, а потим и на основи заключеньох його Шветовей ради.

Як догварене, вибране руководство АРУН ма пририхтац шицки потребни активносци за евентуалне реґистрованє тей фаховей орґанизациї новинарох Руснацох, з тим же по конєчну одлуку же би АРУН бул самостойне, нєзависне здруженє, потребну лоґистичну потримовку будзе давац Шветови конґрес Руснацох, односно його Шветова рада.

(конєц) зам