Otrimana Letňa škola ruskoho (rusnackoho) jazyka

Oтримана Лєтня школа руского язика
У орґанизациї Националного совиту рускей националней меншини и його Одбору за образованє, од 16. по 18. авґуст у Суботици отримана Лєтня школа руского язика.

Лєтня школа руского язика отримана у Доме школярох штреднїх школох, а на нєй участвовали 29 школяре шестих седмих и осмих класох основней школи и даскельо штредньошколци з Руского Керестура, Кули, Крущичу, Вербасу, Коцура, Дюрдьова, Нового Орахова, Бачкей Тополї, Бикич Долу и Привиней Глави.

Школу штварток, 16. авґуста, отворела предсидателька Одбору за образованє Националного совиту Руснацох Мелания Римарова. Руски язик школяром  преподавала професорка Ксения Варґова з Руского Керестура, историю професор Саша Сабадош зоз Зомбора, а виронауку о. Владимир Еделински Миколка, парох беркасовски.

Крем преподаваньох, за школярох орґанизовани и други змисти - нащивели Городску хижу у Суботици, як и Дружтво Руснацох Суботици, дзе им домашнї були  предсидателька Дружтва Ксения Палатинус и активистка у Дружтве Наташа Ґрунчич.

Школяре упознати з роботу секцийох Дружтва, а представительки Дружтва их поволали на уключованє до активносцох Руснацох у Суботици, кед же свойо школованє предлужа у тим городзе.

Наш познати алпиниста Исо Планич, котри и директор Политехнїчней школи у Суботици, з вельким задовольством приял наших школярох у Школи, дзе им бешедовал о алпинизме и о своїх путованьох, а потим ше школяре пендрали на штучну стину.

После вислуханих преподаваньох, остатнї дзень школяре мали интересантни квиз з хторим потвердзели знанє здобуте праве у тогорочней добре орґанизованей и обдуманей Лєтнєй школи.

Професоре уложели вельо труду и з вельку сцелосцу и искуством пририхтали и преподаваня и закончуюце преверйованє знаня, а и викладаче и дзеци заключели же би Школа мала тирвац длужей и же би ше оможлївело участвованє векшого числа школярох зоз шицких местох дзе ше руски язик виучує як виборни предмет. Ґу тому, Школа би мала облапиц и нашо дзеци котри у своїх школох нє маю можлївосц за таку наставу.

(конєц) рим