Otrimana Treca schadzka Švetovoj rady RRL

Отримана Треца схадзка
Перши три числа часопису „Глас Русина” („Голос Русина”), хтори од прешлого року виходзи як орґан Шветового конґресу Русинох/Руснацох/Лемкох (РРЛ), члени Шветовей ради (ШР) на своїм зашеданю у румунским городзе Деви оценєли як добри, наглашуюци же тот проєкт треба предлужиц, як и до тераз з потримовку Влади Словацкей Републики.

На схадзки ШР, отриманей 3. марца, члени Ради у полним составе прилапели предкладанє вимоги Министерству школства Републики Словацкей, же би ше на Прешовским универзитету у Словацкей уведло студиї Русинскей фолклористики за студентох зоз жемох штредней Европи. Ушлїдза дальши крочаї и розгварки, же би  тота инициятива була запровадзена од шлїдуюцого школского року.

Члени Шветовей ради потримали и инициятиву же би ше Штварти Медзинародни конґрес русинкого язика орґанизовало вєдно з Одсеком за русинистику Филозофского факултету у Новим Садзе.

На зашеданю у румунским городзе Дева розпатрани актуални стан и активносци русинских орґанизацийох, членїцох Шветового конґресу у тим року и плановани активносци, анализована реализация заключеньох з 11. конгресу РРЛ и одредзени час и место отримованя Конґресней комисиї за историю, хтора будзе отримана под час Штвартого зашеданя Шветовей ради у Кринїци, у Польскей, у юнию.

На схадзки у Деви, члени ШР прилапели предкладаня Конґресней комисиї за културу,  котри збогаца културни живот рускей заєднїци у реґионє.

Запровадзена награда „Енди Воргол” за културу
Шветови конґрес Русинох/ Руснацох/Лемкох (РРЛ) убудуце будзе додзельовац  Награду “Енди Воргол”, за окремни досяги у обласци култури, одлучене на остатнєй схадзки Ради у Деви, у Румуниї.

Награду “Енди Воргол” ше будзе додзельовац институцийом, орґанизацийом и поєдинцом каждого другого року (биєнално), а будзе  уручована на манифестациї Медзинародни дзень русинскей култури, котру ше будзе отримовац на Подкарпатю, у України.

Запровадзованє спомнутей награди єдно з вецей предкладаньох Комисиї за културу Шветового конґресу РРЛ, котра 3. марца зашедала у румунским городзе Дева, а чийо предкладаня Рада прилапела.

Як гварел предсидатель спомнутей комисиї Миломир Шайтош, буду одредзени пропозициї и критериюми за додзельованє награди „Енди Воргол”, а кандидатури за ню годни давац членїци Швтового конґресу РРЛ.

Комисия на своїм зашеданю у Деви утвердзела и календар 46 културних манифестацийох у рускей/русинскей/лемковскей заєднїци, з хторих за кажду жем-членїцу Конґресу будзе видвоєна по єдна приоритена.

Тиж так, Комисия за културу предложела, а Шветова рада прилапела, снованє Асоцияациї руских подобових творительох - АРТПОТ,  та ушлїдзи єй конституованє.

конєц (єп)