Otrimani 50.Festival kulturi i sportu

Отримани 50. Фестивал култури и спорту
Прешлого викенду, 23. и 24. юния, у Медзилаборцох, у Словацкей, отримани найстарши, того року и ювилейни пейдзешати, фестивал русинскей култури у Словацкей - Фестивал култури и спорту.

Дводньови Фестивал, хторому главни орґанзаторе Русинска оброда у Словацкей и Место Медзилаборци, з рока на рок ма вше векше число учашнїкох и нащивительох, та того року, як гварел предсидатель Русинскей оброди Владимир Противняк, Фестивал у двох дньох мал 12 тисячи нащивительох. Фестивал отримани под покровительством премиєра Словацкей Републики Роберта Фица, а и з финансийну потримовку Уряду Влади Словацкей, з Програми за културу народносних меншинох.

У културно-уметнїцкей програми ювилейного Фестивалу участвовали числени дзецински и музично-танєчни ансамбли старших з рижних местох дзе жию Русини у Словацкей, алє и професийни ансамбл ПУЛС з Прешова, та ансамбли  з України и   Польскей. Попри найпознатших русинских шпивачох, та побиднїкох широкей русинскей акциї „Шпиви мойого роду”, наступели и познати естрадни шпиваче и ґрупи у Словацкей.

У спортскей часци Фестивалу у Медзилаборцох, на змаганю у фодбалє участвовал и керестурски „Русин”, та домашнї ФК „Спартак” и фодбалски екипи з Польскей и Ческей. Як и каждого року, Фестивал мал и богату кирбайску часц з рижнороднима шатрами, а того року була и окремна часц за дзеци з рижнима забавнима бависками. 

Фестивал провадзели и дзешецеро просвитни роботнїки и школяре Школи „Петро Кузмяк”, предсидатель Националного совиту Руснацох Славко Рац, предсидатель Вивершного орґану НС Йовґен Мудри, член Совиту Звонко Гнатко, та дотерашнї предсидатель Дочасового орґану Општини Кула Жељко Ковач.

Госци Фестивалу були и предсидатель Шветовей ради Руснацох/Русинох/Лемкох (РРЛ) Дюра Папуґа з Руского Керестура, подпредсисдатель Комисиї за информованє Шветового конґресу (ШК) РРЛ Владимир Гаргаї з Беґечу и редактор часопису ШК „Глас Русина” Мирослав Силадї з Вербасу. Як дознава Рутенпрес, дзепоєдни Керестурци и приватно провадзели Фестивал у Медзилабороцох.

Фестивал провадзел представитель Влади Словацкей
Фестивал култури и спорту у Медзилаборцох провадзел и ополномоценїк Влади Словацкей Републики задлужени за национални меншини Ласло Надь, котри и окреме бешедовал з предсидательом Шветовей ради Руснацох/Русинох/Лемкох (РРЛ) Дюром Папуґом и предсидательом Русинскей оброди Словацкей Владимиром Противняком.

На роботней схадзки бешедоване о проблемох на хтори наиходза Русини и русински орґанизациї у Словацкей, як и о способох їх ришованя и потребох Русинох и русинских орґанизацийох.

Пан Ласло Надь медзи иншим гварел же од кеди є ополномоценїк Влади, його перша нащива даєдней националней меншини у Словацкей то праве Русином, та найважнєйшей русинскей орґанизациї у Словацкей - Русинскей оброди и Фестивалу у Медзилаборцох.

(конєц) мсл/зам