Otrimani 8.Medzinarodni festival humoru i satirii "Kocurska čutka 2013"

Отримани 8. Медзинародни фестивал гумору и сатири “Коцурска чутка 2013.” 
Внєдзелю у Коцуре, у Доме култури и у просторийох читальнї отримани 8 Медзинародни фестивал гумору и сатири "Коцурска чутка 2013. "

У першей часци програми хтора наволана "Коцурска чуточка" наступели дзеци. Шпивацка ґрупа хтору пририхтала учителька Славица Чельовски одшпивала дазкельо шпиванки, а Катарина Фейди, Даринка Михняк и Силвия Маґоч одбавели представу "Дурни часи" хтору написала и режирала Фейдийова. У дзецинскей часци, зоз гумористичним монолоґом наступел и Балша Шпанович зоз Бачкого Доброго Поля.

Скорей представяня лауреатох наступели и Андрея Макаї зоз виривком монодрами «Кед би я була», Себастиян Няради зоз Руского Керестура виведол свою стенд-ап комедию, а у музичней часци наступел коцурски рок состав Демиґод. Лауреати литерарного конкурсу на тему "250 роки Руснацох у Коцуре" Александар Деветак зоз Вербасу, Ристо Филчевски зоз Струмици (Македония) и Владимир Сабо Дайко зоз Коцура.

Лауреати литерарного конкурсу на тему "Чи 2013. рок баксузнєйши од других рокох" Дюра Шефер зоз Руми, Воїслав Трумпич зоз Яґодини и Веселин Ґайдашевич зоз Фекетичу.
Тогорочни лауреати награди "Соцки" Любица Няради зоз Руского Керестура и Владимир Няради зоз Вербасу.

У музичней часци програми наступел оркестер Били баґрем а на концу тей часци програми представени зборнїк афоризмох "Источно од запада" автора Милада Обреновича зоз Роґатици зоз Републики сербскей.

Найдлукшу чутку кукурици (33 центиметри), того року принєсла Катарина Фейди. У другей часци програми, у коцурскей читальнї, представени карикатури Добривоя Лазаревича зоз Беоґраду, отворена подобова вистава дзецинских роботох на тему "Ламачка 2013." а шицки присутни достали найновше число часопису "Ерато над Коцуром".

 

автор:  цики