Otrimani Festival kultury i sportu (Medzilaborci )

У Медзилаборцох пребували 22-ойо школяре ОШиҐ "Петро Кузмяк" з Руского Керестура и єй петнацецро просвитни роботнїки, на чолє з директором Школи Янком Хомом, та дзепоєдни нашо привреднїки, котри були госци медзилаборскей ОШ у улїци Комнского, предлужуюци длугорочне сотруднїцтво школох, алє и Руского Керестура и Медзилаборцох.

Гоч було похмарене, вигодна хвиля потримала, так же на отвореним, у вельким амфитеатре, на Фестивалє през дваднї участвовали прейґ 1 000 виводзаче у ансамблох з местох дзе жию Руснаци у Словацкей, та госци з Румуниї, України и Русиї.

В соботу вечар, у амфитеатру Фестивала отримани красни огньомет, а вчера на поладнє, по главней улїци Медзилаборцох отримани дефиле часци учашнїкох у народних ношньох, на чолє з мажоретками и городоначалнїком Медзилаборцох Ладиславом Демком, котри на памятнїк на чесц борцох процив фашизму у Другей шветовей войни у центре городу, вєдно з посланїками у Парламетну Словацкей, положел венєц.

 Под час Фестивала, у Музею модерней уметносци "Енди Варгола", отримани и дводньови "Фото-дзень медзи Лаборчанами", на хторим отримане змаганє фотоґрафох и презентовани вецей документарни филми о Русинох, а у орґанизациї и Здруженя интелиґенциї Русинох Словацкей.

Як то по традициї, попри кулурно-уметнїцкей и спортскей програми Фестивала у Медзилаборцох, орґанизована и барз богата забавна часц на вельким просторе коло амфитеатру и фодбалского стадиону, так же на конференциї за пресу з нагоди отримованя Фестивала, предсидатель Русинскей оброди у Словацкей Влаимир Противяк, у мено соорґанизатора, оценєл же тогорочни Фестивал провадзели прейґ 20 000 патраче з Медзилаборцох, местох тей општини, околини, алє и з околних жемох.

Главни орґанизаторе и тогорочного, 48. фестивалу култури и спорту були Место Медзилаборци и Русинска оброда Словацкей, а з финансийну потримовку Министерства култури Словацкей Републики и, як гварел Противняк, за орґанизоване Фестивала з таким обсягом и програмами, потребне прейґ 30 000 еври.

(конєц) зам