Otrimani Literaturni večar "Ľubov i vino"

Отримани Литературни вечар „Любов и вино”

Вчера вечар у коцурскей читальнї, коцурске КПД ДОК отримало Литературни вечар з назву „Любов и вино", хтори бул пошвецени Дню св. Валентина и Дню св. Трифуна.
 
На початку програми, библиотекарка Весна Пешут пречитала животописи святих Валентина и Трифуна, як и народни вереня вязани за тих святительох, а понеже св. Валентин бул и защитнїк любовнїкох, та 14. фебруар прилапени и як Дзень любови, любовну поезию рецитовали школяре коцурскей основней школи.
 
Орґанизатор и модератор вечара професор др Михайло Фейса представел остатнє число Часопису за културу „Ерато над Куцуром/Коцуром", у виданю КПД ДОК и Видавательней хижи „Прометей" з Нового Саду, а присутни поетове чийо писнї обявени у тим чишлє, сами пречитали свойо твори.
 
У предлуженю програми професор Фейса представел и кнїжку Слободана Елезовича „Вецей од живота: Вик биоскопу у Вербаше", у виданю Културного центру Вербас, з хторей пречитал часц пошвеценей биоскопу у Коцуре.
 
На концу поетского вечара шицки присутни у просторийох Дому култури були послужени з вином, так же и на тот способ означени св. Трифун, як защитнїк винїцох и винїцарох.

автор: цики