Otrimani perši večar Festivalu humora i satiri

Отримани перши вечар Фестивалу гумора и сатири
З першей манифестациї тогорочней „Коцурскей чутки”
Награду „Соцки" Фестивалу гумору и сатири „Коцурска чутка", спрам одлуки жирия, достали тройо авторе - першу награду Серафина Медєши, другу Мирослав Силадї, одбидвойо за сатиричну приповедку, а трецу достал Владимир Сабодайко за афоризми.
 
Першу награду на Конкурсу за карикатуру достал Саво Бабич з Лозници, другу Никола Драґаш з Панчева, а трецу награду достал Александар Деветак з Вербасу - сообщел вчера предсиатель КПД ДОК и предсидатель Орґанизацийного одбору Фестивалу проф. др Михайлo Фейсa на вчерайшим першим вечаре тогорочного Фестивалу у коцурскей Читальнї.
 
Перша манифестация Фестивалу гумора и сатири „Коцурска чутка" була пошвецена 80-рочнїци народзеня Миколи Скубана Соцкия, а о його живоце и роботи бешедовал др Фейса, представяюци и кажду зоз седем кнїжкох хтори Скубан, наш познати писатель, поета, новинар и ґлумец, обявел.
 
З нагоди 40-рочнїци виходзеня култного стрипу „Алан Форд" пририхтана вистава спомнутих стрипох, а о феномену того стрипу, хтори векшу популарносц дожил у Югославиї, як у Италиї дзе почал виходзиц, бешедовал тиж професор Фейса.
 
Попри вистави стрипох, у Читальнї була и вистава подобових роботох коцурских школярох на тему ламачки.
 
У програми участвовали и школяре другей класи ОШ и студенти нашей Катедри - та Андреа Макаї пречитала першонаградзену сатиричну приповедку Серафини Медєши, Таня Ґайдош, Сенка Иван, Златко Колєсар и основношколци пречитали приповедки и дзецински писнї Миколи Скубана Соцкия.

-цики-