Otrimani švetočni koncert

 
Шветочни концерт 50. “Червеней ружи” под назву “На штред широкей ровнїни” отримани вчера вечар почал з шветочну шпиванку “Браца Русини” хтору виведол Здружени хор з понад 100 шпивачох з руских културно - уметнїцких дружтвох.Нащивительох привитал и винчовал ювилейни Фестивал министер култури, информованя и информацийного дружтва у Влади Републики Сербиї Предраґ Маркович.

Министер Маркович гварел же руска заєднїца хтора ту присутна понад 250 роки, без нєписмених и з найвекшим процентом високообразованих припаднїкох, може послужиц як приклад шицким же як ше чува свойо:
- Национална заєднїца Руснацох институцийно найзорґанизованша и найпорихтанша у Сербиї - гварел Маркович.
Вон наглашел же способ на хтори руска заєднїца чува свою традицию, язик и виру и обогацуєце власну културу, може буц приклад шицким.

Попри министра Марковича у публики були и посланїки у Скупштини Сербиї Олена Папуґа и Дюра Мученски хтори тиж привитал присутних, покраїнска посланїца Леона Виславски, члени Националного совиту Руснацох, представителє руских здруженьох з Републики Горватскей и представителє амбасади України. Шветочни концерт пред полним аудиториюмом Лєтней бини керестурскей основней и штреднєй школи “Петро Кузмяк” означели наступи репрезентативного руского фолклорного ансамблу составеного зоз танєчнїкох зоз дюрдьовского КУД “Тарас Шевченко”, КУД “Дюра Киш“ зоз Шиду и керестурского Вивидзацкого ансамблу Дому култури хтори з нагоди ювилейней “Ружи” помоцнєли и танєчнїки – ветеранє.

Удатни наступ уж спомнутого Здруженого хору у хторим шпивали члени Хору Дому култури Руски Керестур и хористи керестурскей Катедралней церкви Святого оца Миколая, члени новосадского хору “Гармония” при Руским културним центру и церкви Святого Петра и Павла, як и шпиваче з КПД “Карпати” з Вербасу. Замерковани були и наступи госцох з иножемства - Хлопскей шпивацкей ґрупи “Гачуре” з Гуменого, зоз Словацкей, хтори виведли опсяжнєйши репертоар виходнярских шпиванкох за нєшкайши закончуюци концерт ювилейней “Ружи”, як и Фолклорного ансамблу КУД “Яким Ґовля” з Миклошевцох, з Републики Горватскей и Закарпатского народного хору з Ужгороду, з України.

Українски ансамбл попри власного репертоару виведол и даскельо нашо писнї, а цаловечарши наступ закончел з “Многая лїт”.

Учашнїки Шветочного концерту зоз руских дружтвох виведли и самостойни точки; нови хореоґрафиї и найкрасши руски шпиванки, а медзи наступами, з видео-виривками хтори були емитовани прейґ видео-бимох, орґанизаторе Фестивалу направели омаж дзепоєдним сновательом “Червеней ружи” - Дюрови Папгаргайови, Витомирови Бодянцови и Силвестерови Ґачови.

(конєц) саб